ट्रम्प–किम मेगु महिना नापलाइगु

अमेरिकी राष्ट्रपति डोनाल्ड ट्रम्पं अमेरिकाय् जुइत्यंग मध्यावधि चुनाव लिपा उत्तर कोरियाली नेता किम जोङ अन लिसे वार्ता जुइफुगु खँ धयादीगु दु । सिनेटया मध्यावधि चुनावया प्रचारया निंतिं राष्ट्रपति ट्रम्प थौंकन्हय् देय् चाःहिउ वनाच्वंगु दु । उकिं वय्कलं चुनाव न्ह्यव किम लिसे वार्ताया सम्भावना मदुगु खँ धयादीगु खः ।

अमेरिकाया छुं छुं राज्यय् वइगु नोवेम्भर ६ तारिखय् सिनेटया मध्यावधि चुनाव जुइत्यंगु दु । राष्ट्रपति ट्रम्प व नेता किम दथुइ वंगु जुन महिनाय् सिंगापुरय् न्हापांखुसी वार्ता जूगु खः । उगु शिखर वार्ताय् निम्हं नेतातय्सं कोरियाली प्रायद्वीपय् आणविक निःशस्त्रीकरण यायेगु सहमति याःगु खः ।

निगूगु चरणया वार्ताया वातावरण दयेकेगु निंतिं अमेरिकी विदेशमन्त्री माइक पोम्पेओं थ्व वालय् उत्तर कोरिया, दक्षिण कोरिया, जापान व चीन भ्रमण यानादीधुंकूगु दु ।