ने. सं. ११४४ ञलाथ्व दशमी -

सम्पत्ति दयेवं तःमि जुइमखु

सामाजिक सञ्जालय् बय्बय् जुल- स्पेनया सतकय् छखे ध्यबा ह्वलातःगु, मेखे सिपिं झ्वलिक्क तयातःगु। उकिं न्ह्यसः नं ब्वलंका च्वन । मनू तःधं कि ध्यबा ? अमेरिका थेंजाःगु देसय् न्हिं द्वःछि मनू सित । म्वायेत छटपट जुयाच्वन । धन बिना म्वाये थाकू । उकिं धन मुनेत विकसित देसय् थ्यन । ऐस आरामं जीवन हन । ध्यबा नं मुन । सुविधा सम्पन्न जुल । तर थौं कोभिड १९ कोरोना भाइरसं हलिंन्यंकं दुःख बिल । याउँक नये त्वने मखन । ख्वालय् न्हिलासू मन्त । चान्हय्सिया न्ह्यः छखे लात ।

न्हियान्हिथंया जीवनशैलीइ हिउपाः वल । अझ थुगु ल्वचं जक काइ ला धकाः ग्याये माल । ल्वगीयात अस्पतालय् तकं दुमकाल । म्हिगः तक सा भिं नयेगु । मोटर गयेगु । एयर कण्डिसन दुगु क्वथाय् च्वनेगु । आरामं जीवन हं थें च्वं । तर थौं मोटर दःसां चाःहिले मजिल । ल्वचं कःपिनि न्ह्यःने सुं वने मफुत । अझ चिकित्सक व अस्पतालं तकं वास्ता मयात । थुकिं यानाः थौं न्ह्यसः ब्वलन । धन तःधं कि मनू । याउँक न्ह्यः वयेकेत झःझः धाःगु क्वथा माःगु कि शान्तगु लकस ? ऐश आराम दयेवं याउँक च्वने फइमखु । सुविधा सम्पन्न थासय् च्वनेवं याउँक न्ह्यः वइमखु । अरबौं सम्पत्ति दयेवं तःमि जुइमखु । थुकथंया खँ तथागत बुद्धया जीवनीं नं क्यं ।

सिद्धार्थ राजकुमार । कपिलबस्तुया जुजुया काय् । मचांनिसें ऐश आरामय् ब्वलंम्ह । जुजुं मचांनिसें दरवारय् दुने शास्त्र नापं विद्या नं स्यना बिल । ई कथं च्वने दयेक रम्य, सुरम्य व शुभ नांया स्वंगू दरवार तकं दयेका बिल । बांबांलाःपिं नर्तकीत दरवारय् तल । म्ये हालीपिं, बिना थाइपिं, प्याखं हुलीपिं । न्हियान्हिथंया आरामदायी जीवन । सुख भोगय् ब्वलंकल । ब्याहा यायेगु ई जुल । सर्वगुण सम्पन्नम्ह भौमचा ल्यल । अनंलि यशोधरा देवी नापं ब्याहा यानाबिल । व पाखें काय्मचा छम्ह नं बुल । थुकथं सिद्धार्थयाके छम्ह मनूया लागिं माःगु सकतां दु । मां, बौ, कलाः, काय, ऐश आराम ।

सिद्धार्थया थुलि आनन्दया जीवन दु । तर सिद्धार्थं थुकिं सुख मतायेकू । उकिं थुगु सकतां सुखभोग त्याग यात। ऐश आराम त्वःतल । गृहत्याग यात। सिद्धार्थयात ब्वलंकूम्ह चिरिमां प्रजापति गौतमी खः । प्रजापति गौतमी कपिलबस्तुया जुजु सुद्धोधनया कलाः । दरवारय् च्वनाः याउँक जीवन हनेदुम्ह बडा महारानी । तर गौतमीं नं दरवारया ऐश आराम त्वःतल । भिक्षुणी जुइत कपिलबस्तुं न्यासि वल । तथागतया न्ह्यःने क्वछुल । थः भिक्षुणी मजुइकं लिहां मवनेगु प्रण यात। अझ तथागतं बिया बिज्याःगु च्यागू गुरुलोक धर्म पालना यायेत तकं तयार जुल । धात्थें सुख सयलय् आनन्द जुइगु खःसा गौतमी बुद्ध शासनय् दुहां वइमखु जुइ । अझ अतिकं थाकूगु गरुलोक धर्म नं पालना याइमखु जुइ ।

यशोधरा सिद्धार्थया कलाः । कपिलबस्तु जुजुया भौमचा । सम्पन्न छेँजःया म्ह्याय्मचा । सिद्धार्थं गृहत्याग यासां थः याउँक जीवन हने खंम्ह । कपिलबस्तु राज्यया सर्वेसर्वा जुइ दुम्ह । दक्व राज्य नापं ऐश आराम थःगु ल्हातय् कायेदुम्ह । तर यशोधरां थुकी आनन्द तायेके मफुत । थुकियात छगू जञ्जाल तायेकल । उकिं यशोधरां थ्व सकतां त्वतल । भिक्षुणी शासनय् दुहां वन ।

बुद्ध शासन जाति जंरा मरणं मुक्त जुइगु थाय् खः । थुगु खँ यशोधरां थू । उकिं थः नच्चाम्ह राहुलयात तकं अन दुथ्याकल । खय्त ला राहुल कुमार कपिलबस्तुया भावी जुजु । दरवारया ऐश आरामय् च्वने दुम्ह । भविष्यय् जुजु जुइम्ह । न्हय्दँ तिनि दुम्ह । नच्चाम्ह राहुल कुमार । थः काय सकलें मांया नुगःचू । मामं थःगु ज्यान सिबें सन्तानया मतिना काइ । तर यशोधरां बःचाधिकःम्ह काययात त्याग यात । वया भविष्य दरवारिय ऐश आरामय् मखंकल । उकिं थः काययात तथागतया शरणय् घ्वाना छ्वत ।

सुं गृहपति वा गृहपति पुत्रया बांलाःगु छेँ दु । अन ख्वाउँगु फय् दुहां वये मफु । बांलाक चुकू तयाः झ्याः तिना तःगु दु । अन खाता लासा दु । खाताय् नरम फुंगा दु। चिकंमत च्याकातःगु दु। वयात भार्यापिंसं बांलाक सेवा नं यानाच्वंगु दु। तर थुगु इलय् वयाके रोगजन्य कायिक वा मानसिक दाहा जुल । द्वेषजन्य मानसिक दाहा जुल धाःसा उगु सकतां सुख भोगं वयात सुख बी मखु। वं अन आनन्द काये फइमखु । भोग विलाशं वया चित्त शान्त जुइमखु ।

सुन्दरी नन्दा सिद्धार्थया तता । वया ब्याहा नन्द कुमार नापं जुइत्यंगु । उगु इलय् तथागत कपिलबस्तुइ भोजन बिज्याःगु खः । इपिं निम्हेसिया इहिपा पलखया जक न्ह्यइपु खः । इमिसं सुखमय जीवन हने फइमखु धइगु खँ तथागतं थुइकाः बिज्यात। उकिं तथागतं नन्द कुमारयात मंमदुसां प्रबर्जित यानाबिज्यात । थुकथं ऐश आराम व सुख भोगय् वास्तविक सुख मदु । थुगु खँ तथागत बुद्धया शिक्षां क्यं । राजगृह नगरया पूर्ण सेठया म्ह्याय्, सुमन सेठया भौमचा उतरा खः । छम्ह सेठया भौमचा याउँक जीवन हने दुम्ह खः । तर व शील पालना यायेमाःम्ह । सत्मार्ग थूम्ह खः । थुकिया लागिं वं थः बौयाके १५०० कर्षापण काल । उगु दां सिरिमा गणिकायात बिल । गणिकायात बाःछि तक थः भाःतथाय् तल । थः संघया सेवा यायेत वन । छम्ह सेठया भौमचा दासीं थें ज्या याना जुल । दास दासीया ल्यू ल्यू च्वनाच्वन । पुण्य प्राप्त यायेतउत्तरां थःगु छेँया आरामदायी जीवन शैली त्याग यात ।

गज्याःगु थासय् सुखं च्वनेफइ धइगु खँ तथागत बुद्धं हस्तक आलकयात नं कनाबिज्याःगु दु। छन्हु तथागत आलवी राज्यया सिसापानय् बिज्यात । हेमन्त ऋतुया चा । हिमपात जुइगु ई । छचालं ख्वाउँसे च्वंगु फय् वयाच्वंगु। बँय् स्याउला हः नं आपाः मदु। तथागतयाके ख्वाउँसे च्वंगु चीबर छजु जक । तथागत चीबालागु लँपु जुया बिज्यात। अन छथाय् ल्वहं मुना बिज्यात। अन हे थःगु आसन दयेकाः बिज्यात। उगु आसनय् फ्युतुना बिज्यात। थुगु हे इलय् हस्तक आलक अन थ्यंक वल । तथागतयात अन खनाः व अजू चाल । तथागतयाके न्यन, ‘भन्ते छु छःपिं सुख शयल याना बिज्याना ला ?’ वया खँ न्यनाः तथागतं धयाबिज्यात, ‘हे राजकुमार संसारय् सुख शयल याइपिं मध्ये जि छम्ह नं खः ।’

अनंलि वसपोल थुकथं ध्वाथुइका बिज्यात, यदि सुं गृहपति वा गृहपति पुत्रया बांलाःगु छेँ दु । अन ख्वाउँगु फय् दुहां वये मफु । बांलाक चुकू तयाः झ्याः तिना तःगु दु । अन खाता लासा दु । खाताय् नरम फुंगा दु । चिकंमत च्याकातःगु दु । वयात भार्यापिंसं बांलाक सेवा नं यानाच्वंगु दु । तर थुगु इलय् वयाके रोगजन्य कायिक वा मानसिक दाहा जुल । द्वेषजन्य मानसिक दाहा जुल धाःसा उगु सकतां सुख भोगं वयात सुख बी मखु । वं अन आनन्द काये फइमखु । भोग विलाशं वया चित्त शान्त जुइमखु ।

थुकथं सुखं जीवन हनेत । सुखी जुइत तथागतं थथे धयाबिज्याःगु दु- गुम्ह पुरुष कामभोगय् लिप्त जुइमखु । क्लेशरुपी बाधायात त्याग याइ । दक्व आशक्तयात त्वती । चित्तयात शान्त तइ । उम्ह पुरुष हे सुखं च्वनी । वया जीवन हे सुखमय जुइ ।