लःया भाः थकाल

येँ (नेपालभाषा टाइम्स) – लः व्यापारीतय्सं वाणिज्य विभागलिसेया सहमति कथं धकाः लःया भाः छगू जारय् झितका थकाःगु दु । नेपाल बोटलर्स वाटर एशोसियसनं लः उत्पादक व वितरकतय्त जारया झितका दां थकयाः छगू जारया भाः ५० तका यायेत निर्देशन बिउगु खः । एशोसियसनं थ्वयां न्ह्यः लःया भाः लाक्वपाक्व जुयाच्वंगु धासें छगू जारया ५० तका यायेगु क्वःछिनागु खँ धाःगु दु । अथेहे वाणिज्य विभागया रोहबरय् वंगु साउनय् जूगु सम्झौता कथं भाः क्वःछिनागु खँ नं संघं धाःगु दु । विभागं वंगु साउन २१ गते लःया भाः अप्वलय् ५० तका कायेगु सहमति याःगु खःसां थ्व सहमतियात कयाः उपभोक्तातय्सं तच्वःगु विरोध याःगु खः । विरोध लिपा संसदया उद्योग समितिं विभागया थ्व निर्णय तत्काल कार्यान्वयन मयायेत निर्णय बिउगु खः ।