त्वाःछेँ थुंगु विरोधय् स्थानीयत सतकय्, पुनर्निर्माण मजूतलय् आन्दोलन जारी जुइ

येँ (नेपालभाषा टाइम्स)÷ येँ महानगरपालिकां थाय्मदुया त्वाःछेँ थुनाबिउगु विरोधय् स्थानीयतय् सतकय् कुहां वःगु दु । सतकय् कुहां वःपिं स्थानीयतय्सं त्वाःछेँ थुंगु विरोधय् येँ महानगरपालिकाया मेयर बालेन साहया पुतला च्याकूगु दु । लिसें येँ महानगरपालिकाया मेयर व २५ वडाया वडाध्यक्ष राजेश डंगोलविरुद्ध नारा थ्वयेकाः मशाल जुलुससहित २५ वडा जःखः चाःहिउगु खः ।

येँ महानगरपालिकां शुक्रवाः नेपालभाषा मंकाः खलःया न्हापाया ज्याकू दुगु त्वाःछेँ भवन डोजर हयाः थुनाबिउगु खः । स्थानीयतय्सं उबलय् विरोध याःगु खःसां प्रहरी लगे यानाः जबजस्ति छेँ थुनाबिउगु खः ।

थुकिया विरोधय् शनिवाः स्थानीयत थाय्मदुइ मुनाः येँ महानगरपालिका, मेयर साह व वडाध्यक्ष विरुद्ध नाराबाजी याःगु खः । थाय्मदु दबुलिइ जूगु खबरदारी सभाय् न्ववासें त्वाःछेँ समितिया नायः प्रा. रमेश श्रेष्ठं त्वाःबासीतय् जानाः दशकौं न्ह्यः दयेकूगु छेँयात येँ महानगरपालिकां जबर्जस्ती थुनाः दादागिरी क्यंगु खँ धयादिल । येँ मनपा २५ वडा बिना आधार त्वाःवासीतय्गु छेँ कब्जा यानाः वडा भवन दयेकेगु तयारी यानाच्वंगु धासें थुकिया विरुद्ध त्वाःवासीपिंसं निरन्तर संघर्ष यानाच्वनी धयादिल ।

विरोध सभाय् न्ववासें उपत्यकाब्यापी सतक विस्तार पीडित संघर्ष समितिया नायः सुमन साय्मिं राज्य हे सुनियोजित ढंगं नेवाःतय्त विस्थापित यायेत लगे जुयाच्वंगु धासें थ्व भवन पुनर्निर्माण यानामबिउतले संघर्ष न्ह्याना हे च्वनी धयादिल ।

अथेहे नेवाः देय् दबूया नायः पवित्र वज्राचार्य थौं त्वाःछेँ थुंबलय् विकास खनाच्वंपिंसं छन्हु थःपिनिगु हे छँ थुंवइतिनि धयागु वाः चायेकेमाः धासें छगू त्वालय् दादागिरी याःवःगु इलय् मेगु त्वाःयापिं सुम्क च्वनाः स्वयाच्वने मजिउ धासें सकलें विरोधय् कुहां वयेत इनाप यानादिल ।

अथेहे नेपालभाषा मंकाः खलःया प्रतिनिधि रमेशमान पियां थुगु छेँय् च्वनाः हे नेपालभाषा मंकाः खलकं थीथी आन्दोलन न्ह्याकूगु धासें तःगू इतिहास स्वानाच्वंगु भवन थुनाः महानगरपालिकां नेवाःतय् म्हसीका हे हुइत स्वयाच्वंगु द्वपं बियादिल ।

न्हापा २८ वडाया ज्याकू तयातःगु थ्व छेँयात कयाः महानगरपालिका व स्थानीय दथुइ ताःई न्ह्यवनिसें विवाद जुयाच्वंगु दु । २५ वडां जग्गा थःपिनिगु दावी यासें अन वडा भवन दयेकेगु खँ धयाच्वंगु दुसा स्थानीयतय्सं उगु भवन स्थानीयतय् सामुदायिक भवन जुइमाःगु दावी यानाच्वंगु दु ।

त्वाःछेँ समितिया कथं येँ महानगरपालिकाय् केशव स्थापित मेयर जुयाच्वंगु इलय् २८ वडाया ज्याकू तयेगु निंतिं त्वाःछेँ समितिइ निवेदन तयाः ज्याकू तःगु खः, लिपा वना वडां हे उगु भवनय् थःपिनिगु धकाः दावी यानाहःगु खः । थ्व सम्बन्धय् विवाद तच्वयेवं अदालतय् मुद्दा जुयाच्वंगु दु । जिल्ला अदालतं जग्गाया सम्बन्धय् वडा व स्थानीय निखलसिगुं दावीइ प्रमाण मगाःगु धाःगु दुसा आः थ्व मुद्दा सर्वोच्चय् विचाराधिन दु ।

सम्बन्धित बुखँ

LEAVE YOUR COMMENTS