वानेश्वरय् अश्रुग्यास व लाठीचार्ज

येँ – डा. गोविन्द केसीया समर्थनय् सरकार विरुद्ध कुहां वःपिं नेपाली कांग्रेसया भ्रातृ संगठन तरुण दलया कार्यकर्ता व प्रहरी दथुइ शनिवाः वानेश्वरय् झडप जूगु दु । थ्व झडपय् प्रहरीपाखें निम्ह डिएसपीसहित झिंछम्ह घाःपाः जूगु खँ धाःगु दुसा प्रदर्शनकारी पाखें तरुण दलया अध्यक्ष जीतजंग बस्नेत लिसे स्वीम्हं मल्याक घाःपाः जूगु खँ धाःगु दु । बस्नेतया छ्यनय् प्रहरीं कथिं दाःगु खः ।

प्रहरीं माइतीघरं न्ह्याः वःपिं प्रदर्शनकारीतय्त शनिवाः न्हिनय् अश्रु ग्यास कयेकाः लाठी चार्ज याःगु खः । प्रहरीं प्रदर्शनकारीतय्सं थःपिंत अप्पां कयेकाः निषेधित क्षेत्र त्वाःथलेत स्वःगुलिं अश्रु ग्यास कयेकेमाःगु खँ धाःगु दु ।

प्रहरीया लाठीचार्जय् लानाः समाचार संकलन याः वनाच्वंम्ह प्रेस युनियनया महासचिव अजयबाबु सिवाकोटीया ल्हातय् नं चोट लाःगु दु ।
प्रहरी व तरुण दलया झडपं यानाः डा. गोविन्द केसीया समर्थनय् जुयाच्वंगु प्रदर्शनय् नं लिच्वः लाःगु खः । प्रहरीं अश्रु ग्यास कयेकूबलय् वानेश्वरय् हे डा. केसीया समर्थनय् सोलिडारिटि फर डा. केसी अलाइन्सं यानाच्वंगु कोण सभाय् लिच्वः लाःगु खः ।

डा. केसीया समर्थकतय्सं वानेश्वरय् प्रदर्शन यानाच्वंगु इलय् माइतीघरय् मुनाच्वंपिं तरुण दलया प्रदर्शनकारीत नं जुलुस सहित वानेश्वरपाखे न्ह्याःवंगु खः । उपिं वानेश्वर चोकपाखे वनेत स्वयेवं तनाव जूगु खः । प्रहरीं उमिति लिइत अश्रुग्यास कयेकूबलय् वानेश्वरय् प्रदर्शन यानाच्वंपिं प्रदर्शनकारीत नं प्रभावित जूगु खः ।

नेपालभाषा टाइम्स

च्वमिया मेमेगु

• वतु त्वालय् दन्त शिविर
• पासा पुचः गुथि लन्दनया न्हूधाः
• ज्यापु समाजया निर्वतमान नायः तीर्थलालया अबु मंत
• ‘मौसम पूर्वानुमानयात गम्भीर रुपं मकाःगुलिं यक्व क्षति जूगु खः’ – वरिष्ठ माैसमविद् मणिरत्न शाक्य
• नखःचखःया दिं कायेत झीगु संस्कृतिया मौलिक परम्परा म्हसीकेमाल