‘दाहाल अध्यक्ष जुइ धइगु ग्यारेन्टी मदु’

येँ – प्रधानमन्त्री एवं एमाले अध्यक्ष केपी ओलीं एकता लिपाया महाधिवेशनं माओवादी अध्यक्ष पुष्पकमल दाहालयात अध्यक्ष दयेकेगु धकाः आश्वासन बिउसां उकिया ग्यारेन्टी मदुगु खँ एमालेया मेपिं शक्तिशाली नेतातय्सं धयाहःगु दु ।

थ्वहे ग्यारेन्टी मदुगु सम्भावना खंकाः अध्यक्ष दाहालं एमाले–माओवादी एकता जुइ धयातःगु वैशाख ९ गतेया मिति समेत लिछ्याना बिउगु खः ।

एमाले व माओवादी एकताया लागिं आन्तरिक रुपं अतिकं सघन ज्या यानादीम्ह एमालेया उपमहासचिव बिष्णु पौडेलं एकता महाधिवेशन लिपा दाहालयात अध्यक्ष दयेकेगु जुइ धकाः आः हे च्वयाः बी मफइगु खँ स्पष्ट यानादीगु दु । म्हिगः अनलाइन खबर डटकमलिसे खँ ल्हासें वय्कलं थ्व खँ धयादीगु खः ।

एमाले अध्यक्ष ओलीं माओवादी अध्यक्ष दाहालयात एकता लिपा पार्टीया अध्यक्ष दयेके धकाः आः हे च्वयाः बी फइ मखु धासें वय्कलं थ्व खँय् अध्यक्ष दाहाल प्रस्ट जुयादीसां जिउ धकाः नं धयादीगु दु ।

पार्टी एकता जुइबलय् केन्द्रनिसें क्वय् थ्यंकंया निकायय् थःपिंत बराबरीया हिस्सा मबिल धाःसा कन्हय् थःपिं अल्पमतय् लाइगु व महाधिवेशनय् नं पराजित जुइ मालीगु संकेत दाहालं खंकादीगु दु ।

उकथं हे थौंकन्हय् एमालेया मेम्ह नेता माधव नेपाल तसकं प्रशन्न मुद्राय् खने दयाच्वंगुलिं वय्कःयात नं ओलीं एकता लिपा पार्टी अध्यक्ष दयेका बी धकाः गोप्य आश्वासन बियातःगु जकं मदु धकाः नं दाहालं शंका यानाच्वंगु खँ सूत्रतय्सं धाःगु दु ।