ने. सं. ११४४ ञलाथ्व दशमी -

हेपाटाइटिस सी पत्ता लगे याःपिंत नोबेल

एजेन्सी – हेपाटाइटिस सी भाइरस पत्ता लगे याःपिं स्वम्ह वैज्ञानिकतय्त चिकित्साशास्त्र पाखे थुगुसीया नोबेल पुरस्कार बीगु घोषणा जूगु दु। बेलायती वैज्ञानिक माइकल हाउटन व निम्ह अमेरिकी अनुसन्धानकर्तात हार्भी अल्टर व चाल्र्स राइसयात नोबेल पुरस्कार बीगु जूगु खः ।

नोबेल पुरस्कार समितिं थुकिं यानाः लखौं मनूतय् ज्यान बचे यायेत ग्वाहालि जूगु खँ धाःगु दु। थ्व भाइरसं स्येँया क्यान्सर यानाबीगु खः । थ्व भाइरस हे स्येँ प्रत्यारोपण यायेमालीगुया मू कारण खः । सन् १९६० या दशकनिसें दातातय् पाखें हि काःपिं विरामीतय्के स्वँया अज्ञात दीर्घल्वय् खनेदयावःगु खः । नोबेल समितिं उबलय् मेपिनिगु हि थनेगु ज्यायात ‘रुसी रुलेट’ अर्थात जुवा म्हितेगु थें जूगु टिप्पणी याःगु खः ।

थौंकन्हय् जुइगु बांलाःगु परीक्षणया कारणं आः संसार थ्व समस्यापाखें मुक्त जुइधुंकूगु दुसा थ्व भाइरसविरुद्ध नं प्रभावकारी वासः दयेधुंकूगु दु। अथेखःसां अझ नं न्हय्गू करोड मनूतय्के थ्व भाइरसया संक्रमण खनेदयाच्वंगु दनिसा दँय्दसं न्हय्गू लाख मनूतय् ज्यान कयाच्वंगु दु।

हेपाटाइटिस ए व बी भाइरस सन् १९६० दशकया मध्यपाखे पत्ता लगे जूगु खः । लिपा प्राध्यापक हार्भी अल्टरं मेगु नं रहस्यमय संक्रामक तत्व अस्तित्वय् दुगु पुष्टि यानादीगु खः । थ्व रहस्यमय ल्वय्यात ‘नन ए व नन-बी’ धायेगु यात । प्राध्यापक माइकल हाउटनं सन् १९८९ य् थुगु भाइरसया आनुवंशिक संरचना पत्ता लगे याःगु खः । प्राध्यापक चार्ल्स राइसं सेन्ट लुइस्थित वाशिबटन युनिभर्सिटीइ सन् १९९७ य् थ्व भाइरस बारे थप अनुसन्धान याःगु खः ।वय्कलं आनुवंशिक रुपं परिशोधन यानातःगु हेपाटाइटिस सी भाइरस चिम्पान्जीया स्वँय् तयाः थुकिं हेपाटाइटिस जुइगु प्रमाणित यानादीगु खः ।