भारतया केरलाय् निम्ह मिस्तय्गु बलि
एजेन्सी÷ दक्षिण भारतय् च्वंगु केरला राज्यया पथानामथिट्टा जिल्लाय् निम्ह मिस्तय्त आर्थिक समृृद्धिया निंतिं धकाः बलि बिउगु घटना सार्वजनिक जूगु दु । भारतया अंग्रेजी पत्रिका ‘द हिन्दू’ इ पिहां वःगु समाचार कथं केरलाया निगू जिल्लां तंपिं निम्ह मिस्तय् बलि बिउगु खः ।
प्रहरीं पद्म व रोसली नांयापिं थुपिं निम्ह मिस्त मालेगु झ्वलय् भगवत सिंह व लैला नांयापिं कलाः–भाःत व शफी (रशिद) नांया छम्ह मिजंयात ज्वंगु खः । उमिके न्यनेकने याःबलय् थुपिं निम्हेसितं बलि बिउगु सीदुगु खः । पद्माया हत्या सेप्टेम्बरया अन्तिम वालय् व रोसलीया हत्या जुनय् जूगु खँ पत्रिकाय् न्ह्यथनातःगु दु ।
कोच्ची नगर प्रहरी अधिरक्षक सीएच नागाराजं धाःकथं थुपिं स्वम्हं जानाः निम्ह मिस्तय्त स्यानाः लाशयात थःगु छेँय् हे थुनाबिउगु खः । अभियुक्ततय्सं अपराध स्वीकार याःगु प्रहरीं पुष्टि यायेधुंकूगु दु ।
प्रहरीं बिउगु जानकारीकथं शफी व भगवल सिंहयात अर्थिक समस्या जुयाच्वंगु खः । अर्थिक संकट म्होयात भगवल सिंहयात शफिं मानव बलि बिइगु सल्लाह बिउगु खः । शफी तन्त्रमन्त्र याइम्ह खः धाःगु दु । थ्व धुंकाः शफीं हे ५७ दँया पद्मा व ४९ दँया रोसलीयात जागिर नकेगु व आर्थिक
लोभ बियाः ब्वनाहःगु खः ।
उमिगु सीम्ह थुनातःथासं लिकयाः उमि परिवारयात क्यंबलय् म्हसीके हे मफयेक ध्वगिना वनेधुंकूगुलिं प्रहरीं डीएनए जाँच यानाः सीपिं म्हसीकूगु खः । भारतया थीथी थासय् अन्धविश्वासया कारण थथे मानव बलि बीगु घटना बारम्बार जुइगु याः । थज्याःगु घटना अप्वः धयाथें मिस्त व मस्त हे पीडित जुइगु याः ।
LEAVE YOUR COMMENTS