ओबामा, बिल गेट्सपिनिगु टि्वटर ह्याक

एजेन्सी – विश्वया ततःधंपिं हस्तीतय् ट्विट एकाउन्ट ह्याक जूगु दु। साइबर आक्रमणय् अमेरिकाया पुलांम्ह राष्ट्रपति बराक ओबामा लिसें राष्ट्रपतिया निंतिं डेमोक्य्राटिकया उम्मेदवार जो बाइडन, अर्बपतित जेफ बेजोस, एलन मस्क, बिल गेट्स, माइकल ब्लुमबर्ग, र्यापर कानियवेस्ट थेंज्याःपिं हस्तीत लाःगु दु ।

अथेहे उबर व एपल थेंज्याःगु संस्थाय् ह्याकरतय्सं आक्रमण याःगु खँ धाःगु दु। ह्याकरतय्सं ओबामा, बाइडन व वेस्टया खाताय् मखुगु ट्विट छ्वयाः मनूतय्के द्वःछि डलर क्रिप्टोकरेन्सी चन्दा कथं बीत धयातःगु खः । बिल गेट्सया ट्विटरय् च्वयातःगु दु, ‘जितः सकस्यां मेपिंत बीत इनाप याना च्वनी, व आः उगु ई वःगु दु। जितः १००० डलर छ्वयाहजि, जिं २००० छ्वया हये ।’

थ्व सन्देश लिपा उमिसं छ्वयाहःगु बिटक्वाइन खाताय् छगू लाख डलर जम्मा जुयधुंकूगु खँ धाःगु दु। टेस्ला व स्पेस एक्स कम्पनीया प्रमुख एल मस्कया आधिकारिक ट्विटय् नं थज्याःगु म्यासेज छ्वयाः डिजिटल वालेटया लिंक नं छ्वयाहःगु खः । उकी बाघौ दुने छ्वयाहःगु फुक्क बिटक्वाइनया भुक्तानी दोबर यायेगु खँ धयातःगु खः । थुपिं ट्विटर वःगु छुं ई लिपा हे चिइकाछ्वःगु खः । टि्वटरपाखें प्रमाणित यायेत टिकमार्क बियातःगु थुपिं खाताय् आः थप ट्विट याये मजिइकेधुंकूगु दु ।

बिबिसीं धाःकथं ट्विटरय् थथे बिटक्वाइन निदुगं यायेगु धकाः सन्देश वइगु काण्ड न्हापां निसें जुया वयाच्वंगु घटना खः । तर तःधंगु ल्याखय्सा र्वजनिक व्यक्तितय् खाता ह्याक जूगु धाःसा थ्व न्हापांगु घटना जूगु खँ धाःगु दु ।