अमेरिकी संसद भवनय् हुलदंगा, प्यम्हेसिया ज्यान वन

एजेन्सी – अमेरिकी संसद भवन क्यापिटल हिलय् राष्ट्रपति डोनाल्ड ट्रम्प समर्थकतय्सं याःगु हुलदंगाय् लानाः प्यम्हेसिया ज्यान वंगु दु। वंगु नोभेम्बरय् जूगु अमेरिकी राष्ट्रपति चुनावय् जो बाइडन त्याःगु प्रमाणित यायेत बुधवाः संसद भवनय् क्वय्या सदन व सिनेटया मंकाः बैठक जुयाच्वंगु इलय् थ्व दंगा जूगु खः । ट्रम्प समर्थकतय्सं बाइडेन राष्ट्रपतिइ निर्वाचित जूगु प्रमाणित यायेगु ज्या दिकेगु ताः तयाःगु थ्व हुलदंगा याःगु खः ।

राष्ट्रपति ट्रम्पं चुनावय् धाँधली जूगु द्वपं बिया वयाच्वंगु दुसा बुधवाः दंगा जूगु इलय् संसद भवनय् मुनेत नं ट्रम्पं हे आह्वान याःगु खः । ट्रम्पं थः समर्थकतय्त क्यापिटल हिलय् वनाः नोभेम्बरय् जूगु २०२० या चुनावया लिच्वः पल्टे यायेत आह्वान याःगु खः । थ्व हे आह्वान कथं संसद भवन न्ह्यःने मूवंपिं समर्थकतय् भीडं सुरक्षाकर्मीलिसे झडप यानाः संसद भवन तक दुहां वंगु खः ।

सुरक्षाकर्मीलिसे जूगु झडपय् लानाः प्यम्हेसिया ज्यान वंगु पुष्टि जुइधुंकूगु दु। छम्ह ट्रम्प समर्थक मिसायात प्रहरीं गोलीं कयेकूगु खःसा मेपिं स्वम्ह धाःसा घाःपाः जुयाः मदुगु खँ धाःगु दु। वाशिंगटन डिसीया छम्ह वरिष्ठ प्रहरी अधिकारीं संसद भवनय् निगः पाइप बम नं लूगु खँ धाःगु दु ।

थ्व आक्रमक भीडयात डोनाल्ड ट्रम्पं विशेष भीड धकाः प्रशंसा नं याःगु खः । सामाजिक सञ्जालय् तयातःगु छगू भिडियोय् राष्ट्रपति ट्रम्पं भीडयात लिहां वनेत ला अपिल यात, लिसें चुनावय् व्यापक धाँधली जूगु धकाः मखुगु दावी नं यायेवं भीड आक्रमक जुयाः संसद भवनय् न्ह्याःवंगु खः । थ्व भिडियोयात लिपा ट्विटर, फेसबुक व युट्युबं लिकया बीधुंकूगु दु। थ्व घटनाय् लिपा ट्विटर, फेसबुक, इन्स्टाग्रामं राष्ट्रपति ट्रम्पया आधिकारिक खातायात हे लक याना बीधुंकूगु दु। थुपिं सोसल मिडियातय्सं ट्रम्पं मनूतय्त भड्के यानाच्वंगु व भ्रमित यानाच्वंगु धासें प्रतिबन्ध तयागु खँ धाःगु दु ।

थ्व घटनायात कयाः नवनिर्वाचित राष्ट्रपति जो बाइडनं थ्व विरोध मखु, दंगा फसाद खः धकाः धाःगु दु। अमेरिकाया पुलांम्ह राष्ट्रपति जर्ज बुश, बाराक ओबामां नं थ्व घटनाया निन्दा यासें इतिहासं क्यापिटल हिलय् जूगु घटनायात राष्ट्रया अपमानया रुपय् लुमंका तइ धाःगु दु। थ्व दंगा जूगु प्यघौ लिपा जो बाइडनया विजययात प्रमाणित यायेगु ज्याझ्वः न्ह्याकूगु खः ।

क्यापिटल हिलय् जूगु थ्व घटनायात अमेरिकाया इतिहासय् दकलय् बांमलाक सुरक्षा नियमया उल्लंघन जूगु खँ धाःगु दु। थ्व घटनायात कयाः विश्वन्यंकंया नेतातय्सं विरोध याःगु दु। संयुक्त राष्ट्र संघया महासचिव एन्टोनियो गुटेरसं प्रजातान्त्रिक प्रक्रियाया सम्मान जुइमाः धयादीगु दु। युरोपेली संघया विदेश मामिला प्रमुख जोसेफ बोरलं विश्वया नजरय् अमेरिकाया लोकतन्त्र घेराबन्दी लाःगु खनेदु धाःगु दु। आयरल्यान्डया विदेशमन्त्री साइमन कोभेनीं थ्व घटना राष्ट्रपति व वया समर्थकतय्सं चायेक चायेकं हे लोकतन्त्रय् आक्रमण याःगु खँ धाःगु दु। बेलायती प्रधानमन्त्री बोरिस जोनसनं घटनायात लज्जाजनक धासें शान्तिपूर्ण व व्यवस्थित रुपं शक्ति हस्तान्तरण यायेत इनाप यानादीगु दु ।