कोरोनाया वासःया सम्भावना मदु : डब्लुएचओ

एजेन्सी – विश्व स्वास्थ्य संगठनं विश्वय् महामारीया रुप कया वनाच्वंगु कोरोना भाइरसया वासः निर्माण जुइगु सम्भावना मदुगु खँ धाःगु दु। संगठनं कोरोना भाइरसया अचुक वासः मिले जुइगु सम्भावना तसकं म्हो जक दुगु नं स्पष्ट याःगु दु ।

संगठनया प्रमुख डा. टेड्रोस एडहोनम ग्राबिएसं कोरोना भाइरसया भ्याक्सिन यक्वं देशं दयेकाच्वंगु जूसां वासः निर्माण जुइगु सम्भावना धाःसा मदु धाःगु दु। संगठनया प्रमुख डा. ग्राबिएसं थ्व स्वयां न्ह्यः कोरोना भाइरस गबलें नं अन्त्य मजुइगु व थुकिया विरुद्ध ल्वायेगुया मेगु विकल्प नं मदुगु प्रतिक्रिया बिउगु खः ।

कोरोना संक्रमणपाखें बचे जुइत मुख्य रुपं सामाजिक दूरी कायम यानाः च्वनेगु, इलय् व्यलय् साब्वं लखं ल्हाः सिलेगु, मास्क तयेगु व पंजा न्ह्यायेगु हे जक मुख्य उपाय जूगुलिं सकसिनं सावधानी नालेत नं संगठन प्रमुख ग्राबिएसं विश्व समुदाययात अपिल याःगु दु। मौसम परिवर्तन जुल धायेवं कोरोना भाइरस नं परिवर्तन जुइ धइगु सोच सत्य मखु धासें वय्कलं आःया अवस्थाय् विश्व समुदाय कोरोनालिसे संघर्ष यायेगु बाहेकं मेगु विकल्प वा उपाय मदु धयादीगु दु । थ्व हे झ्वलय् कोरोना भाइरसया भ्याक्सिन निर्माणया क्रम स्वंगूगु चरणय् थ्यंगु व भ्याक्सिन प्रभावकारी सावित जुइ फइगु दावी नं वय्कलं यानादीगु दु।

लिपांगु इलय् विश्वय् कोरोना संक्रमितया ल्याः १ गू करोड ८४ गू लाख पीस्वलं मल्याक थ्यनेधुंकूगु दुसा सीपिं नं न्हय्गू लाख जःखः थ्यनेधुंकूगु दु। सन् २०१९ डिसेम्बरया अन्त्यपाखे चीनया हुबेइ प्रान्तया वुहान सहरं थ्व भाइरसया संक्रमण न्यना वंगु खः ।