एमाले अनुशासन आयोगया दुःख

येँ – सत्तारुढ पार्टी नेकपा एमाले केन्द्रीय अनुशासन आयोगं देय्या थीथी थासय् जुयाच्वंगु बलात्कार, हत्या, बोक्सी थेंज्याःगु काण्डय् उकियात नियन्त्रण यायेगु ज्याय् सरकारी निकायतय्गु ध्यान तदारुकतापूर्वक मवं धकाः दुःख व्यक्त याःगु दु । आयोगया अध्यक्ष अमृत बोहराया अध्यक्षताय् म्हिगः च्वंगु बैठकंं वर्गीय व सामुदायिक सरोकारया विषयय् सः तयेमाःगु पार्टीया थीथी स्थानीय कमिटी, अनेमसंघ, युवा संघ थेंज्याःगु जनसंगठनत तकं निष्क्रिय व मूकदर्शक जक जुयाच्वंगु खँय् न्ह्यसः थनेगु ज्या नं याःगु दु । बैठकं न्ह्यसः तःगु दु – गनं पार्टी पंक्तित राजनीतिक व वैचारिक दृष्टिकाणं विमुख जुजुं वनाच्वंगुया संकेत जकं थ्व मखु ला ?

अथे हे पार्टीया आन्तरिक संगठनात्मक अवस्था बारे नं सहलह यासें बैठकं ताः ई न्ह्यवंनिसें पार्टीया केन्द्रंनिसें आधारभूत तह तकया कमिटीतय् बैठक तकं नियमित रुपं मच्वंगु, पार्टी कमिटीत निष्क्रिय जुयाच्वंगु, पार्टीया विधि व पद्धति व प्रणालीत नं धमाधम कमजोर जुजुं वनाच्वंगु, पार्टीइ व्यक्तिवाद, आचरणहिनता व अनुशासनहीनाता अप्वयाच्वंगु खँय् नं ध्यानाकर्षण याःगु दु ।