तेस्रो लिङ्गीया नागरिकता कायेत २० लाख !
येँ – छुं नं देय्या नागरिकया पहिचान धयागु वयागु नागरिकता जुइ । नेपाःमिया पहिचान नं वयागु नागरिकता खः । नेपाःया नागरिकताय् मिजं वा मिसा धयागु पहिचान सहितया नागरिकता बी । आः अल्पसंख्यक ‘तेस्रो लिङ्गी’पिंसं थःगु पहिचान सहितया नागरिकताया माग याना वयाच्वंगु दु । सरकारं नं उमिगु मागया संवोधन यायेगु कथं ‘तेस्रो लिङ्गी’या पहिचान सहितया हे नागरिकता बिइगु निंतिं न्हूगु विधेयक प्रस्ताव याःगु दु । तर थ्व विधेयक कथं ‘तेस्रो लिङ्गी’या पहिचान सहित नागरिकता कायेगु खःसा म्होतिं नं नीगू (२०) लाख खर्च यायेमाःगु अवस्था वइग जूगु दु ।
सरकारं प्रस्ताव याःगु न्हूगु विधेयकय् तेस्रो लिङ्गीया पहिचान सहित नागरिकता कायेगु खःसा लिङ्ग परिवर्तन यानागु प्रमाणपत्र पेश यायेमाःगु प्रावधान दुथ्याःगु दु । यदि थ्व विधेयक पारित जुल धाःसा तेस्रो लिङ्गीतय्सं विदेश वनाः लिङ्ग परिवर्तन याना वयेमाली । थथे याःगु खःसां छम्हेसिनं थःगु लिङ्ग परिवर्तन यायेत म्होतिं नं नीगू लाख खर्च यायेमाली ।
नागरिकता विधेयकया थ्व व्यवस्थां ध्यबा मदुपिं तेस्रो लिङ्गीतय्त धाःसा तःधंगु समस्याय् लाकाबिउगु दु । थज्याःगु हे समस्याय् लानाच्वंम्ह तेस्रो लिङ्गी सुदीप गौतमं धाल, ‘जिमिसं नागरिकताया निंतिं थुलिमछि ध्यबा गनं खर्च यायेफइ । ध्यबा दुपिं छम्ह निम्हेस्यां ला खर्च यानाः लिङ्ग हिलावइ, तर जिपिंथें ज्याःपिंसं ला थःगु पहिचान सहितया नागरिकता कायेमखनीगु हे जुल ।’
थःगु पहिचान सहितया नागरिक मदुगुलिं थःत वःगु समस्यायात वय्कलं थुकथं कन, ‘जि तेस्रोलिङ्गी मिजं खः । जिं नागरिकता कयाबलय् मिसा धकाः जने यानातःगु नागरिकता बिल । न्हापा छातिइ खनेदुगु दुरुपा जिं निगू लाख फुकाः चानाः वांछ्वये धुन । आः जि मिजं थें च्वं, ग्वाय् दारि नं खनेदु । जिं मोबाइलया सिम कायेत जिगु न्हापायागु नागरिकता बियाबलय् सिम बीम्हेस्यां छ मिजंम्हेसिनं मिसा धकाः जने यानातःगु नक्कली नागरिकता बियागु ला धकाः नागरिकता हे वांछ्वयाबिल ।’
प्रस्तावित विधेयक कथं तेस्रो लिङ्गीया पहिचान सहितया नागरिकता कायेत पूवंक लिङ्ग हिलेमाः । थुकिया अपरेशन नेपालय् मजू, विदेशय् वनाः याःवनेमाः, अले थुकी म्होतिं नं नीगू लाख खर्च जुइ । ‘थुकिं यानाः ध्यबा खर्च यायेमफुपिं तेस्रो लिङ्गीया पहिचान हे हुयावनीगु खनेदत’ सुदीपं धाःगु दु । यदि थ्व विधेयक गथे खः अथे हे पारित यायेगु खःसा सरकारं हे नेपालय् हे लिङ्ग परिवर्तन यायेगु व्यवस्था यानाबीमाःगु माग तेस्रो लिङ्गीतय् दु ।
LEAVE YOUR COMMENTS