असार तक छतँजाः थकायेगु लक्ष्य

येँ – तःभुखाचं पाःताः जुइक दुना वंगु ऐतिहासिक मरुसतः आः वइगु असार तकया दुने छतँजाः थकायेगु कथं ग्वसाः न्ह्यःने न्ह्याःगु दु । मरुसतः दयेकेगु लागिं स्थानीय जनता जानाः उगु हे लागां त्याना वंम्ह प्रदेशसभाया सांसद राजेश शाक्यया अध्यक्षताय् काष्ठमण्डप पुनर्निर्माण समिति गठन याःगु खः ।

समितिं आन्तरिक रुपं यानाच्वंगु तयारीया ज्या क्वचायेवं आः मरुसतः दना यंकेगु चरण सुरु यायेत्यंगु खँ सीदुगु दु । मरुसतः दनेगु लागिं येँ महानगरपालिकां सिड मनीया रुपय् ५० लाख तका दां तया बिउगु खः । आः थुगुसीया बजेटय् मरुसतःया लागिं मेगु ८ करोड तका दां तया बिउगु दु । मरुसतः थ्वहे स्वदँया दुने निर्माण सम्पन्न यायेगु लक्ष्य तयातःगु दु ।

मरुसतःया लागिं आवश्यक सिँ चूलाइगु जुइवं आः निर्माण ज्या तीव्र गतिं न्ह्याकेगु खँ धाःगु दु । थ्व झ्वलय् आः वइगु असार तकया दुने छतँजाः थकायेगु लक्ष्य तयाः ज्या न्ह्याकेत्यंगु नं समितिया सूत्रं धाःगु दु । थ्व निर्माण ज्या न्ह्याकीबलय् सिँ लगायत थ्वलिसे स्वाःगु थीथी कलात्मक ज्या सकस्यां खनी कथं हे न्ह्याकाच्वनेगु खँ नं धाःगु दु ।