चारुमति विहारय् बुद्धपुजा व प्रवचन ज्याझ्वः

येँ – चारुमति विहारय् विशेष बुद्धपुजालिसें प्रवचन ज्याझ्वः जुल । चारुमति बुद्धिष्ट मिसन नेपालया ग्वसालय् उगु ज्याझ्वः जूगु खः ।
शाक्यमुनि भगवान गौतम बुद्धं मानव कल्याणया निंतिं बियाबिज्याःगु अहिंसा, शान्ति, मित्रता, भातृत्वया सन्देश स्मरण यासें न्ह्याःगु ज्याझ्वलय् अमेरिका लस एन्जलसं बिज्याःम्ह बौद्ध गुरु तथालोकं बौद्ध इतिहासय् ताःहाकःगु परम्परा कःघानाच्वंगु चारुमति चैत्ययात विश्व सम्पदाया धलखय् सुचीकृत यायेमाःगु खँय् बः बियाबिज्यात ।

लिसें वसपोलं उगु सम्पदायात अन्तर्राष्ट्रिय तहय् प्रचार यानाः बौद्ध साहित्ययात प्रवद्र्धन याये फइगु विचाः नं तयाबिज्याःगु खः ।
ज्याझ्वलय् विहार प्रमुख लिसें आयोजक संस्थाया अध्यक्ष भिक्षु तपस्सी धम्मं बौद्ध दर्शनलिसें साहित्यया माध्यमं देय्या थीथी ग्रामिण भेगय् सामाजिक, मानवीय व स्थानीय विकासया गतिविधि नं न्ह्याका वयाच्वनागु जानकारी बियाबिज्याःगु खः ।