गय् यानाः वल येँया खुसिइ खुसिबाः ?

येँ- म्हिगः चान्हय् येँया खुसिइ वःगु थ्व बाः बारे बांलाक अध्ययन यायेमाःगु खँ मौसमविद्तय्सं धाःगु दु । ग्लोबल वार्मिङया कारणं यानाः थौंकन्हय् विश्वन्यंकं हे तसकं वा वयाः खुसिबाः वयेगु ज्या जुयाच्वंगु दुसा अज्याःगु हे प्रकोप नेपालय् नं जूगु खँ वरिष्ठ मौसमविद् मणिरत्न शाक्यं कनादीगु दु ।

म्हिगः ‘नेपालभाषा टाइम्स’ लिसे खँ ल्हासें वय्कलं धयादिल, ‘थौंकन्हय् संसारया तापक्रम धमाधम क्वाना वनाच्वंगु दु । उकिया हे लिच्वः कथं थ्व खुसिबाः वःगु जुइमाः ।’

वय्कःया कथं येँय् जक वा वःगु कारणं थथे खुसिबाः वःगु मखु । बागमति व बिष्णुमति खुसिया मुहान दुगु लागाय् ‘क्लाउड ब्रस्र्ट’ जुयाः थथे जूगु खयेमाः । क्लाउड ब्रस्र्ट जुइबलय् २–३ किलोमिटर लागाया छगू भूमिइ तसकं वा वइ, जःखः च्वंगु लागाय् धाःसा छुं हे जुइ मखु । थथे जुइबलय् तसकं नँ न्याइ ।

म्हीग न्हिनय् तक स्वनिगःया छुं हे थासय् वा वइगु संकेत तकं खने मदुगु खः । तर चान्हय् तसकं वा वयाः खुसिबाः वल । थ्व नं विश्वय् वयाच्वंगु तापक्रम वृद्धिया हे लिच्वः खःगु खँ वय्कलं कनादिल । म्हिगःया खुसिबाः तसकं दुर्लभ घटना जूगु खँ कँसें थुकिया अध्ययन जुइमाःगु बिचाः नं वय्कलं तयादिल ।