ट्रम्पं विद्यार्थी पितिनेगु निर्णय लितकाल

एजेन्सी – ट्रम्पं प्रशासनं अमेरिकाय् च्वनाः अनलाइन कक्षा जक कयाच्वंपिं विदेशी विद्यार्थीतय्त लित छ्वयेगु निर्णययात आःयात दिकूगु दु ।

वंगु वालय् जक ट्रम्प प्रशासनं अनलाइनं जक कक्षा कयाच्वंपिं विदेशी विद्यार्थीतय्त लितछ्वयेगु घोषणा याःगु खः । सरकारया थ्व योजना विरुद्ध म्यासाचुसेट्स इन्ष्टिच्यूट अफ टेक्नोलोजी व हार्वर्ड युनिभर्सिटी अदालतय् वनेवं ट्रम्पं प्रशासनं थःगु निर्णयं लिचिउगु खः ।

म्यासाचुसेट्सया डिस्ट्रिक्ट जज एलिसन बरों फुक्कं पक्षय् लिसे सम्झौता जुइधुंकूगु खँ धाःगु दु। न्यूयोर्क टाइम्सया कथं थ्व सम्झौता अनुसार मार्चय् लागू याःगु नीतियात हे हाकनं लागू याःगु दु। थ्व नीति कथं अनलाइन क्लास जक कयाच्वंपिं विद्यार्थी जूसां वैधानिक रुपं हे विद्यार्थी भिसाय् अमेरिकाय् च्वनेदइ ।

अमेरिकां दँय्दसं लखौंलख विद्यार्थीत आखः ब्वनेगु निंतिं थ्यंकः वइ । अमेरिकाया आम्दानीया छगू तःधंगु स्रोत थन ब्वंवइपिं विद्यार्थीत नं खः । हार्वर्ड विश्वविद्यालयं कोरोना संक्रमण न्यनेफइगु ग्याःचिकुया कारणं अनलाइन क्लास जक संचालन यायेगु घोषणा याःगु खः । वंगु वालय् अमेरिकी प्रशासनं विश्वविद्यालयय् वनाः कक्षा काःवंपिं विद्यार्थीत जक अमेरिकाय् च्वनेदइगु खँ धाःगु खः ।

मार्चय् कोरोना संक्रमण तच्वया वयेवं यक्व हे विदेशी विद्यार्थीत थःथःगु देशय् लिहां वंगु खःसा अमेरिकां आः अनलाइन क्लास जक कयाच्वंपिं विद्यार्थीतय्त हाकनं लिहां वयेगु स्वीकृति मबीगु खँ धाःगु दु ।