सिरियाय् आक्रमण यायेगु फ्रान्सया ख्याच्वः

फ्रान्सया राष्ट्रपति एम्मानुएल माक्रों सिरियाली सरकारं थः नागरिकविरुद्ध रासायनिक हतियार छ्यलाच्वंगु प्रमाण लुत धाःसा सिरियाय् आक्रमण यायेफुगु ख्याच्वः बियादीगु दु । पत्रकारतलिसे खँ ल्हासें वय्कलं धयादीगु दु, ‘गन थज्याःगु आक्रमण जुइ अथवा गनं आक्रमणया तयारि जुयाच्वंगु दु, अन फ्रान्सं आक्रमण याइ ।’तर प्रतिबन्धित रासायनिक हतियार छ्यलाच्वंगु धयागु बारे फ्रानसेली गुप्तचर निकायं आःतकु छुं प्रमाण लुइकेमफुनिगु खँ नं वय्कलं धयादीगु दु । वंगु जनवरी लिपा सिरियां शंकास्पद रुपं क्लोरिन ग्यास आक्रमण यानाच्वंगु थीथी प्रतिवेदन वयाच्वंगु झ्वलय् राष्ट्रपति म्याक्रों थ्व ख्याच्वः बियादीगु खः ।

सिरियाया विद्रोहीतय् नियन्त्रणय् दुगु छगू शहरय् थ्व हे फेबु्रअरीया सुरुपाखे रयासन तयातःगु छगः बम कुर्केवं सासः ल्हायेत समस्या जुयाः गम्हेसिन अस्पताल भर्ना याःगु खः । उत्तर पश्चिम इड््िलब प्रान्तया साराकेब धाःथासय् छगः सरकारी हेलिकप्टर थ्व बम कुर्कूगु द्वपं विद्रोहीतय्सं बिया वयाच्वंगु दु । मेखे सिरियाली सरकारं धाःसा रासायनिक हतियार छ्यल धकाः वःगु द्वपंयात अस्वीकार यासें सर्वसाधारणयात थःपिंसं आक्रमण मयानागु खँ धयाच्वंगु दु ।