व्यस्त राजमार्गय् एनाकोन्डा

झीमध्ये यक्वसिनं लँय् वनाच्वनेबलय् सर्प ध्वदुइगु धइगु सामान्य हे खः । अझ थ्व ताल्लाया इलय् तराई लागाय् वन धाःसा अन सर्पया बिगबिगि हे जुइ । थज्याःगु अवस्थाय् सर्पया छगू प्रजाति ‘एनाकोन्डा’ वल धाःसा छु यायेगु ? गुलिसिया ला सातु हे वनी जुइ !ब्राजिलय् नं छगू थज्याःगु हे घटना जूगु दु ।

ब्राजिलया ‘बीआइआर–३६४’ राजमार्ग जुयाः वनाच्वंपिं मनूत छझाः सकलें अजू चाल । इपिं गुगु राजमार्ग जुयाः वनाच्वंगु खः अन इमिसं विचाः हे मयाःकथंया जीव न्ह्यःने वयेवं न्यासि वनाच्वंपिं जक मखु, गाडी, साइकल तकं तक्क दित । पोर्टो भेल्होस्थित नर्थवेस्टर्न सिटी लिक्कसं लाःगु राजमार्गय् आकाझाकां सर्पया छगू प्रजाति एनोकोन्डा खने दयेवं सकलें तक्क दिउगु खः ।

झण्डै ९ दशमलव ८ फिट ताःहाकःम्ह एनाकोन्डां लँ त्वाःल्हायेत वनाच्वंगु इलय् सवारी साधन दक्वं दिकाः लँ त्वाःल्हायेत ग्वाहालि याःगु खः । राजमार्ग जुयाः वनाच्वंपिंसं थःथःगु सवारी साधन दिकाः एनोकोन्डायात लँ त्वाःल्हायेत ग्वाहालि याःगु जक मखु, अबलय् इमिसं उगु दृश्यया गाक्कं फोटो व भिडियोतकं काःगु खः ।

सर्पं लँ त्वाःल्हानाच्वंगु भिडियो फेसबुक लगायतया सामाजिक संजालय् सेयर यानातःगु दु । भिडियो पोस्ट याःम्ह मध्ये छम्ह बायोलोजिष्ट प्लाभियो तेरासानीं ब्राजिलया ‘जीवान ग्लोबो’ नांया छगू संचारमाध्यम नापं खँ ल्हासें उम्ह एनाकोन्डा करिब १० दँ दुम्ह जुइमाःगु अनुमान यासें थःगु नसा व बाय् मालेगु झ्वलय् पिहां वःगु इलय् दापा जुयाः सतकय् वःगु खयेमाः धाःगु दु ।

सम्बन्धित बुखँ

LEAVE YOUR COMMENTS