ने. सं. ११४४ कौलाथ्व पारू - नःलास्वनेगु

रुसं युक्रेन निगू राज्ययात स्वतन्त्र घोषणा यात, शान्ति स्थापनाया निंतिं रुसी सेना दुहां वनेत आदेश

एजेन्सी- रुसया राष्ट्रपति भ्लादिमिर पुटिनं युक्रेनया पूर्वी लागाय् च्वंगु विद्रोही पुचःया नियन्त्रण दुगु निगू राज्य डोनेट्स्क व लुहान्सकयात स्वतन्त्र राज्यया मान्यता बीगु घोषणा यायेवं युक्रेन संकट झन् तच्वःगु दु । थुकिया लिसें पुटिनं उगु लागाय् शान्ति स्थापनाया निंतिं प्रवेश यायेत रुसी सेनायात आदेश बीवं विश्वय् तनाव तच्वःगु दु ।

अमेरिका, बेलायतलिसें पश्चिमी देय्तय्संं पुटिनया थ्व पलाःयात युक्रेनय् थःगु सेना प्रवेश याकेगु निंतिं आधार दयेकूगु धाःगु दु । संयुक्त राष्ट्र संघ व युरोपेली संघं नं थ्व पलाःया आलोचना याःगु दु । अथेहे नेटों नं रुसी पलाःया विरोध यासें समस्या समाधानया कुतःयात कमजोर यायेगु ज्या याःगु धाःगु दु ।

रुसया थ्व घोषणालिपा मंगलवाः युक्रेनया राष्ट्रपति भोलोदिमर जेलेन्स्कीं राष्ट्रया नामय् सम्बोधन यासें थज्याःगु ज्यां थःपिं मग्याःगु व थःपिनिगु भुमिया छगू इञ्च नं त्वःतेगु जुइमखु धाःगु दु । राष्ट्रपति जेलेन्स्कीं रुसं शान्ति स्थापनाया कुतः व अन्तर्राष्ट्रिय वार्ताया प्रक्रियायात ध्वस्त याःगु द्वपं नं बिउगु दु । जेलेन्स्की युक्रेनं शान्ति चाहे जूगु व राजनीतिक व कूटनीतिक सामाधानयात समर्थन यानागु नं धाःगु खः । युक्रेनया विदेशमन्त्री दिमित्रो कुलेबां रुसयात कडा प्रतिबन्ध तयेत आह्वान याःगु दु ।

मेखे रुसया थ्व घोषणालिपा अमेरिका व युरोपेली देय्तय्सं रुसयात कडा प्रतिबन्ध तयेगु तयारी याःगु दु । राष्ट्रपति जो बाइडेनं रुसी पलाःया कडा निन्दा याःगु दु । अमेरिकां युक्रेनय् सक्रिय जुयाच्वंपिं विद्रोहीतय्त आर्थिक नाकाबन्दी तयेगु व माःसा थप शतिm परिचालन यायेगु धाःगु दु ।

अमेरिकाया विदेशमन्त्री एन्टोनी ब्लिङ्कनं रुसं युक्रेनय् रुसी चरमपन्थीतय्सं नियन्त्रणय् कयातःगु पृथकतावादी लागायात समर्थन याःगु द्वपं बिउगु दु । अथेहे बेलायतं युक्रेनय् रुसी हमला शुरु जुइधुंकूगु धाःगु दु । अस्टे«लियां नं रुसया थ्व पलाःयात बकवास धासें विरोध यःगु दु । अथे हे जर्मनीं रुसं आत्मघाती निर्णय याःगु धाःगु दु । फ्रान्सं रुसं थःपिं लिसे याःगु प्रतिबद्धताया उल्लघंन याःगु धाःगु दु । जापानं नं रुसया विरोधयासें युक्रेनयात साथ बिइगु धाःगु दु ।

युक्रेन तनावयात कयाः संयुक्त राष्ट्र संघीय सुरक्षा परिषद्या बैठकय् चीनं दक्व पक्षयात संयमित जुइत इनाप याःगु दु । चीनं कूटनीतिक सामाधानयात लसकुस यायेगु चीन धाःगु दु । भारतं युक्रेनया सिमाना विवाद गम्भीर चिन्ताया विषय जूगु धाःगु दु । दक्व पक्ष संयमित जुयाः कूटनीतिक कुतः यानाः निगुलिं पक्षयात मान्य जुइकथंया समाधान मालाः शान्ति व सुरक्षा कायम यायेत भारत बः बिउगु खः ।

युक्रेन संकट तच्वया वंगुलिं नेपाःया परराष्ट्र मन्त्रालयं युक्रेनय् दुपिं नेपालीतय्गु विवरण कायेगु शुरु याःगु दुसा जर्मनीइ च्वंगु दुतवासं युक्रेनय् सछि मल्याकं नेपाली दुगु जानकारी बिउगु दु । युक्रेनय् च्वपिं नेपालीतय्सं बिबिसीयात थःपि त्रासय् म्वाना च्वनागु धाःगु दु । जर्मनीइ च्वंगु नेपाःया दुतवासं थःपिनिगु उद्धार जुइगु जानकारी बिउगु नं उम्ह नेपाली विद्यार्थीं धाःगु दु ।

रुसया लिपाःगु पलाखं विश्व व्यापारय् नं लिच्वः लाःगु दु । विश्वया शेयर बजारय् भाः कुहा वंगु दुसा चिंकया भाः आःतकया हे उच्च विन्दुइ थ्यंगु दु । विश्वन्यकं तरङ्गित जुयाच्वंगु इलय् मस्कों धाःसा थपिं वार्ताया निंतिं तयार दु धयाच्वंगु दु ।