ने. सं. ११४६ अनलाथ्व दशमी -

जनबहाःद्यःया देगः जीर्णोद्धार ज्या लथालिंग जूगु द्वपं

येँ (नेपालभाषा टाइम्स)÷ नेपाःस्थित भारतीय दूतावासया आर्थिक ग्वाहालिइ जुयाच्वंगु जनबहाःद्यः देगः पुनर्निर्माण ज्या लथालिंग जूगु धासें स्थानीय सरोकारवालातय्सं अन ज्या रोके याना बिउगु दु ।

देगः जीर्णोद्धार यानाच्वंपिंसं जीर्णोद्धार सम्बन्धी छुं रिपोर्ट नं मबिउगु व ज्या नं योजना कथं मन्ह्याकूगु धासें स्थानीय सरोकारवालातय्सं भारतीय दूतावासया ध्यानाकर्षण याना वयाच्वंगु खः । तर उकी छुं हे लिसः मबीवं वंगु वालंनिसें अन ज्या हे रोक्का याना बिउगु खः । तर ज्या रोक्का जूसां दुवातासं छाय् रोक्को जुल धकाः न्यं तकं मवःगु खँ अनया पुलांम्ह वडा अध्यक्ष निलकाजी शाक्यं ‘नेपालभाषा टाइम्स’ यात कनादिल ।

देगः जीर्णोद्धार सिमधयाः थौंकन्हय् जनबहाःद्यःयात हे अःखः दिशाय् स्वकाः तयातःगु दु ।