
झीगु केन्द्रीय मानन्धर संघया ज्या ‘भिंतुना, लसहना (Congratulations), बिचाः हायेकेगु, इहि मुंकेगु, दछिया छक्वः स्वयम्भू भ्वय् न्यायेकेगु, स्वयम्भू भ्वजय् अनेतने ज्याझ्वः यायेगु’ आदिइ तक्यनाच्वनेगु त्वःताः थ्व बाहेकं मेमेगु नं सुथांलाक्क झी मानन्धरतय् लागि अले सकल नेवाः समुदायया लागि यक्वं यायेगु दु । याये जिउ ।
चिकं साः – झीगु परम्परागत त्वालय् च्वंगु चिकं साःयात आधुनिकीकरण यानाः उकियात व्यावसायिकीकरण (commercialize) याये जिउ । येँ महानगरपालिकां अनुदान बियाः अज्याःगु चिकं साः जिर्णोद्वार यानाबिल धकाः मक्ख जुयाच्वनेगु ई मखु थ्व । झी धइपिं थ्व स्वनिगःया मूलवासी खः । झी पुर्खां पलिस्था याना थकूगु फुक्क साः, थौंया स्वनिगःया Core city दु । Core city इ थौंकन्हय् ७ तँनिसें ८ तँजाः तकया छेँ दनेदु । (का म पा मापदण्ड २०७४) ।
समुदाययाConcept या लिधंसाय् झी मालामाल जुइफु । मारवाडीतय् छगू जकथाय् दुसा, झी तयां तयेथाय् मदयेक ग्वाःग्वाः साः थाय्थासय् दु । स्वनिगःया मूमू थासय् दु । ईकथं छ्यले मसयाः जक खः, मखुसा नेपाःयात हे माःथाय् माःकथं ग्वाहालि याये फुपिं खः, झी मानन्धर, साय्मित ।
थौंया ई – छेँज्या व बुँज्या जक यानाच्वनां मगाः । मिजं जक मखु मिसात तकं अद्दाय् १० ताः इलय् वनाः सनिलया ५ ताःईतक च्वनेमाः । गुलिखे निजी अद्दाय् ला बहनिसिया ७ ताः ईतक नं च्वनेमाः । मस्तय्त स्कूलया बस वइगु थासय् तक त्वःतः वनेमाः, काःवनेमाः । मखुसा उकिया निंतिं छम्ह ज्या याइम्ह लहीमाः । अःपु मजू, थौंया इलय् स्वनिगलय् म्वायेगु । मचा छम्ह जक दतकि नं वयागु निंतिं द्वलंद्वः दां अलग्ग फ्यायेमाः ।
ई गनं गन थ्यने धुंकल ! झीसँ झीत हिले मफु ! सुं मनू मंत, सनाः छकः वंसा, न्हिछि अन हे । सनाः हे वने म्वायेका छ्वयेमाल धाये त्यनागु मखु । न्हिछियात घौछि (घण्टा)या इलय् गथे यानाः हीके फइ ? स्वयेमाल जक धाये त्यनागु खः।
हना वयाच्वनागु संस्कार परम्परायात अःपुक समयसापेक्ष गुकथं म्वाकातयेगु बिचाः यायेमाल धायेत स्वयागु खः । झीगु संस्कार, संस्कृति, परम्परा विश्वय् (हलिमय्) हे नां जाः । थज्याःगु सभ्य समाजया तजिलजि (संस्कृति) न्हंका छ्वयेगु खँ जुइ हे मखु । समयसापेक्ष यायेत जक स्वयेगु खः । न्हंकेत न्ह्यचिलाच्वंपिं नं उत्तिकं दु । नेपालय् नेवाः जाति धइपिं इतिहासया गुगुं कालखण्डय् हे नं मदु धायेकेत स्वयाच्वंपिं नं मदुगु मखु । ऐतिहासिक लुँहितिया सुना वंगु लः हाकनं हायेकेगु पलेसा ‘झीगु धरहरा झीसं दयेके’ धकाः अरबौं तका दां फुकाःदयेकीपिं महिताःत नं मदुगु मखु ।
‘हं !’ धाःम्हेसिनं खापा खं वने माः धाइ । उकथं कुलेत स्वयागु खँ मखु थ्व । फुपिंसं फुकथं यानाः झीगु तजिलजियात समयसापेक्ष यायेत स्वयेत जक थ्व खँन्ह्यथनागु खः । लिचिलेत स्वयागु नं मखु ।
धायेत झीगु केन्द्रीय मानन्धर संघ मारवाडी सेवा समिति स्वयां लछि न्ह्यः पलिस्था जूगु धाइ ! तर थौं मारवाडी सेवा समिति गन ? झी गन ? बिचाः याये हथाये मजूनिला ?
à तँसा – न्हूसाः – झ्वःछेँ त्वाःया ‘बालसेवामा.वि.’ लय् सछि दामं सनाः गुथि, न्हूसाः त्वालं बालंं बियातःगु । थौंकन्हय् उगु ब्वनेकुथि दुगु जग्गा इहिपा मजूपिं अतिकं नुगः क्वसाःपिं निम्ह तःकेहेँपिंसं सनाः गुथियात दान बिउगु खः । उगु इलय् खलः, पुचः, गुथिया नामय् छेँबुँ तल कि सरकारी जूवनी धइगु ग्याःचिकुं न्हूसाः त्वाःया उगु ईया कजिया नामय् लःल्हाःपिं इपिं हे निम्ह नुगः क्वसाःपिं तःकेहँेपिं खः ।
सरकारं शिक्षा ख्यलय् उलि चिउताः कयामच्वंगु उगु इलय् त्वालं लय् सछि तका दामं जग्गा बालंं बियाः ब्वनेकुथि संचालन याकूगु खः । थौंया इलय् स्वनिगलय् ब्वनेकुथि स्वयां नेवाःतय् सामाजिक, सांस्कृतिक, ऐतिहासिक रीतिथिति, परम्परा, गुथि म्वाकेमाःगु दु । उगु ईया आवश्यकता ब्वनेकुथि खःसा थौंया आवश्यकता गुथि खः । विदेशी पर्यटकत ब्वनेकुथि स्वयेत मखु, झीगु सांस्कृतिक स्थल स्वयेत वइगु खः ।
स्कूलया लागि सरकारयाके माक्वं जग्गा दु धयागु खँ नं थुइकेमाः । थज्याःगु छेँबुँ मालाः स्वयावन धाःसा मेमेथाय् नं मदइ मखु ।
LEAVE YOUR COMMENTS