ने. सं. ११४४ ञलाथ्व पुन्हि - येँया: पुन्हि

निबन्ध कासाय् त्याःपिंत सिरपाः लःल्हात

ख्वप- मैत्रेय युवा संघया ग्वसालय् जूगु निबन्ध धेंधेंबल्लाः कासाय् विजयी जूपिंत सिरपाः लःल्हाःगु दु । संघया रजतजयन्तीया लसताय् जूगु निबन्ध कासाय् उत्कृष्ट जुयादीपिंत वंगु शनिवाः जूगु छगू ज्याझ्वःया दथुइ सिरपाः व दसिपौ लःल्हाःगु खः ।

संघया नायः लक्ष्मीचन्द्र वज्राचार्यया सभापतित्वय् जूगु ज्याझ्वलय् मूपाहांकथं श्रद्धेय भिक्षु अर्जुन बिज्याःगु खः । पंचशील ग्रहण यासें न्ह्याःगु ज्याझ्वलय् संघया न्वकु तीर्थराज वज्राचार्यं लसकुस यानादिसें परियत्ति शिक्षायात ब्वनेकुथिस्तरय् नं संचालन यायेमाःगु खँय् बः बियादिल ।

संघया रजतजयन्ती महोत्सवया लसताय् ग्वसाः ग्वःगु निबन्ध कासा संघपाखें हे ग्वसाः ग्वःगु बुद्ध शिक्षाया आधारभूत तालिमय् ब्वति काःपिनि दथुइ जूगु खः । कासाय् पम्फा लामिछाने (कालिका मा.वि) न्हाप, पुनम जोशी (मुनि विहार) लिउ व मञ्जु खड्का (एभरेष्ट इंग्लिश स्कुल) लियांलिउ लाःगु खः । मुक्कं च्याम्ह कासामिपिंसं ब्वति काःगु निबन्ध कासाया लिच्वः बौद्धविद्वानलिसें निर्णायक कमिटीया डा. त्रिरत्न मानन्धरं ब्वनाः न्यंकादीगु खः ।

निबन्ध कासाय् ब्वति कयादीपिं पुनम जोशी व सरिता के.सीं थःथःगु नुगःखँ तयेगु झ्वलय् बुद्ध शिक्षाया आधारभूत तालिम यक्व हे उपलब्धीमूलक जूगु व बुद्ध शिक्षाया अध्ययन व विपश्यना ध्यान भावनाया अभ्यासं जीवनय् यक्व हे सकारात्मक हिउपाः वःगु अनुभूति यानागु खँ कनादिल ।

कासामिपिं नापं २०७७ सालया एसइइ परीक्षाय् ताःलाःपिं संघया दुजःपिंत नं सिरपाः लःल्हाःगु ज्याझ्वलय् मूपाहां अर्जुन भन्ते नं बुद्ध शिक्षायात व्यवहारय् छ्यलेमाःगु विषयय् धर्मोपदेश बियाबिज्याःगु खः । कासाय् त्याःपिंत संघरत्न शाक्यं नगद पुररस्कार लःल्हानादीगु ज्याझ्वलय् संघया सहसचिव मेघना श्रेष्ठं सुभाय् देछानादीगु खः ।