चिनियाँ सामान वयेगु बन्द

येँ (नेपालभाषा टाइम्स)-चीनं नेपाःया नाका बन्द यानाः सामान पना बीवं बजारय् नेपालय् उत्पादन जूगु सामानया माग अप्वया वःगु खँ सम्बन्धित व्यापारीतय्सं धाःगु दु । चीनं कोरोना महामारीया त्वहःचिनाः वंगु निवाः न्ह्यः नेपाः दुहां–पिहां जुइगु तातोपानी व रसुवागढी निगुलिं नाका बन्द याना बिउगु खः ।

चीनं नाका बन्द याःगुलिं न्ह्यःने वयाच्वंगु मोहनि व स्वन्तिया लागिं धकाः हयातःगु करिब १५० गः कन्टेनर सामान लँय् हे थानाच्वंगु खँ सम्बन्धित व्यापारीतय्सं धाःगु दु । चीनया लँय् थानाच्वंगु नेपाली व्यापारीतय्गु सामानया ल्याःचाः तयेगु करिब १ अर्ब २५ करोड तका बराबरया सामान थौंकन्हय् लँय् अलपत्र अवस्थाय् लानाच्वंगु खँ धाःगु दु । यदि चीनं इलय् हे नाका मचायेकल धाःसा थुकी मध्ये आपालं सामान ध्वगिनाः थःपिंत यक्व नोक्सान जुइगु खँ नं व्यापारीतय्सं धाःगु दु । लिसें याकनं सामान हये मफुत धाःसा मोहनि व स्वन्तिया थःपिनिगु व्यापार स्यनीगु खँ नं व्यापारीतय्सं धाःगु दु ।

थ्वहे झ्वलय् थनया न्हूसतक, वटु, गुच्चात्वाः लागाया व्यापारीतय्सं चीनया सामान बन्द जुइवं बजारय् नेपाली उत्पादनया माग अप्वया वःगु खँ धाःगु दु । थौंकन्हय् खास यानाः नेपालय् हे दयेकीगु ब्याग, वसः, लाकां आदि थेंज्याःगु तयारी ज्वलंया माग अप्वयाच्वंगु दु ।

चीनं खास यानाः वंगु कोरोना कालंनिसें हे नेपाःया निगुलिं नाका बन्द याःगु खःसा कोरोना लिपा नं थ्व नाका पूवंक चायेकेगु ज्या धाःसा याःगु मदुनि । थुकिं यानाः नेपाःया बजारय् चिनियाँ सामानया आयात अथें नं म्हो जुयाच्वंगु खः । आः झन पूवंक हे नाका बन्द याना बिउगुलिं बजारय् चिनियाँ सामानया अभाव शुरु जुइगु अनुमान याना हःगु दु ।

चीनं बन्द याःगु नाका चायेकेगु लागिं नेपाःपाखें कुतः याःसां चीनपाखें सकारात्मक लिसः मवःनि धाःगु दु ।

सम्बन्धित बुखँ

LEAVE YOUR COMMENTS