प्रधानमन्त्री व स्वास्थ्यमन्त्री विरुद्ध मुद्दा

येँ (नेपालभाषा टाइम्स) – प्रधानमन्त्री केपी ओली व स्वास्थ्यमन्त्री भानुभक्त ढकालयात अदालतया अवहेलना याःगु मुद्दा लाःगु दु। कोरोना भाइरसया परीक्षण व संक्रमिततय् उपचार निःशुल्क यायेत सर्वोच्च अदालतं यानातःगु फैसलाया उल्लंघन यासें सर्वसाधारणयाके उपचार व परीक्षणया शुल्क कायेगु सुरु यायेवं प्रधानमन्त्री व स्वास्थ्य मन्त्री विरुद्ध अदालतया अवहेलनाया मुद्दा लाःगु खः ।

सर्वोच्च अदालतं वंगु असोज २७ गते हे कोरोना परीक्षण व उपचारया निंतिं सरकारी स्वास्थ्य संस्थाय् छुं नं कथंया शुल्क मकायेत निर्देशनात्मक आदेश बिउगु खः । अदालतं कोरोना संक्रमणलिसे स्वाःगु फुक्कं सेवा ‘आधारभूत स्वास्थ्य सेवा’ दुने लाःगु धासें थज्याःगु सेवा फुक्कं निःशुल्क यायेत आदेश बिउगु खः । तर थ्वयां न्यान्हु लिपा हे सरकारं कोरोना संक्रमण जूपिं सर्वसाधारणयाके ध्यबा कयाः जक उपचार यायेगु व ध्यबा कयाः जक परीक्षण यायेगु निर्णय याःगु खः । अधिवक्तापिं लोकेन्द्रबहादुर ओली व केशरजंग केसीं प्रधानमन्त्री ओली व स्वास्थ्यमन्त्री ढकाल विरुद्ध अदालतया अवहेलना याःगु धासें मुद्दा दर्ता याःगु खः ।