भारतय् थानाच्वन चिनी

येँ – संघीय सरकारं चिनी आयातय् परिमाणात्मक बन्देज (कोटा सिस्टम) लागू यायेधुंकाः सरकारी स्वामित्वय् दुगु साल्ट ट्रेडिङं आयात याःगु थ्यंमथ्यं १३ करोड तका बराबरया २५०० मेट्रिक टन चिनी भारतया सुख्खा बन्दरगाहया गोदामय् थन्के जुयाच्वंगु दु ।

मोहनि व स्वन्ति नखःयात लक्षित यासें कर्पोरेसनं भारतया पश्चिम बंगालया हल्दियाय् च्वंगु रेणुका सुगर मिलपाखें उगु चिनी आयत याःगु खः, तर लिबाक थ्यंकः वःगुलिं उगु चिनी भन्सार पास मजुयाः वंगु प्यला न्ह्यवंनिसें गोदामय् थानाच्वंगु खः ।

वंगु भदौ २१ गते च्वंगु मन्त्रिपरिषद् निर्णयया आधारय् वाणिज्य विभागं चिनीया जाँचपास मयायेत पत्राचार याःगुलिं थज्याःगु समस्या वःगु खँ सुख्खा बन्दरगाह भन्सार कार्यालयं धाःगु दु । सुख्खा बन्दरगाहया गोदामय् तयातःगु चिनी त्वःतेगु बारे आः तक गुगुं नं कथं निर्देशन मवःगु खँ भन्सारं धाःगु दु ।

चिनी ताः ई तक गोदामय् लानाच्वंगुलिं न्हिं निगू लाख तका डिमरेज पुलेमालाच्वंगु दु । चिनीइ न्हापा सरकारं १५ प्रतिशत भन्सार कयाच्वंगु खःसा चिनी उद्योगया दबाबय् ३० प्रतिशत भन्सार काःगु खः ।