बुद्धकालया गणतन्त्रात्मक राज्य

थौं सकलें असन्तुष्ट । सत्तापक्षप्रति जनता असन्तुष्ट । जनता खनाः सत्तापक्ष रुष्ट । खय्तला देसय् गणतन्त्र वये धुंकल । संघीयतां थाय् काये धुंकल । गणतन्त्रं देसय् शान्त ब्वलनी, जनतां याउँक जीवन हने खनी । देय् विकास जुइ । सकसियां थ्वहे इच्छा याःगु खः ।

तर थौं नं देसय् सुशासन मदु। हत्या हिंसां थाय् कयाच्वंगु दु। सत्ता पक्षं याःगु ज्याखं जनताया पक्षय् मदु। देय्प्रति माया मतिना याइपिं, निष्पक्ष न्याय याइपिं । निःस्वार्थ भावं ज्याखं याइपिं । थःगु कर्तब्य पालना याइपिं थन मदया वन । सकलें थःथःगु भोग विलाशय् तक्यन । शिक्षित समाजय् जंगली ब्यवहार ब्वलना वल । गणतन्त्र व संघीयताय् दयेमाःगु लकस मदया वन ।

गणतन्त्रात्मक देसय् देय् व जनताया भिं यायेत न्ह्याकीगु शासन पद्धति खः । थुकी जनताया निर्णय सर्वमान्य जुइ । जनताया हितया ज्याखं जुइ । सत्तापक्ष व जनतां छगू हे मतं ज्याखं याइ । छम्हं मेम्हेसित ग्वाहालि याइ । थुकथंया गणतन्त्रात्मक राज्य बुद्धकालय् नं दु। बुद्धकालय् गंगाया पारीपाखे लिच्छविपिनि गणतन्त्रात्मक वजनी राज्य दु। तथागत बुद्धं तकं थुगु राज्यया वर्णन याना बिज्याःगु खः । थुगु राज्यय् न्ह्याकीगु शासन पद्धति छक्वः स्वये ।

मस्त देय्या भविष्य खः । उकिसनं विद्यार्थी देय्या थां खः । वजनी राज्यया विद्यार्थीपिं अतिकं मेहनति। इपिं सुथ न्हापां दनी । आचार्यया सेवा सुश्रुषा याइ । अनंलि शील शालाय् वनाः ब्वंवनी । पाठ अभ्यास याइ । सुथया नयेगु नये धुंकाः हाकनं शिलशालाय् वनी । जा नयेगु ई जुइवं जा नइ । अनं लिपा नं पाठ ब्वनेगु ज्या न्ह्याकी । आराम यायेगु इलय् सिं लिधंसा कयाः आराम याइ । ब्वने क्वचायेकाः छेँय् लिहां वइ । बहनी जा नये धुंकाः प्रथम प्रहर तक अध्ययनय् ब्यस्त जुइ । इपिं लगनशील व अप्रगाढी जुयाः शिल्प अध्ययन याइ । इपिं धनु विद्याय् अतिकं निपुण ।

न्हियान्हिथं राज्यया जनतात मुनेगु ई दु। मुनेगु ई जुइवं बिगुल पुइ । बिगुलया सः तायेवं थःगु न्ह्याथें जाःगु ज्या नं त्वःताः जूसां सभागृहय् वनी । सकलें अन हाजिर जुइ । छुं प्रान्तय् वा गनं अशान्ति जूगु खँ वःसा सकलें दुजःपिं तयार जुइ । यदि सुनानं थःगु ज्या इलय् मयाःसा प्रमुखं वयात उत्साहित यानाच्वनी । छम्हं मेम्हेसित ग्वाहालि याइ । इमि दथुइ ग्वाहालि यायेगु व ग्वाहालि कायेगु चलन दु। थुकथं ग्वाहालि काइगुलिं संघीय गणतन्त्र सुदृढ जू । राज्यय् मेमेगु राज्यया जुजु पाहां वःसां सकलें मुनाः लसकुस याइ । सुख व मंगल ज्याखँय् जक मखु । दुःख, अमंगल, रोग, ब्याधी जुइगु इलय् नं सकलें मुनाः ग्वाहालि याइ ।

सुं स्त्री वा कुमारिपिंत कुदृष्टिं स्वइमखु। यदि सुनानं ब्यभिचार यात धाःसा थ्व खँ संघय् छ्वइ । संघया आज्ञाकथं दुराचारीयात दण्ड बी । वयात प्राण दण्ड तकं बीगु नियम दु। न्याय निसाफ नं छम्हेसिया ल्हातं जक जुइमखु। थुकिया लागिं छसिकथं पद ब्वथलातःगु दु ।

जनतायात पीर मर्का वा बोझ जुइकथं छुं करया ब्यवस्था याइमखु। अजाअजि व थकालिपिनिगु खँ सकसिनं न्यनी । न्हापाया घटना नापं इमिगु अनुभव न्यनेत सकलें लँ च्वनाच्वनी । इपिंपाखें आपालं खँ सीकी । इमिगु खँ मनन् याइ । राज्यय् सुं स्त्री वा कुमारिपिंत कुदृष्टिं स्वइमखु। यदि सुनानं ब्यभिचार यात धाःसा थ्व खँ संघय् छ्वइ । संघया आज्ञाकथं दुराचारीयात दण्ड बी । वयात प्राण दण्ड तकं बीगु नियम दु । न्याय निसाफ नं छम्हेसिया ल्हातं जक जुइमखु। थुकिया लागिं छसिकथं पद ब्वथलातःगु दु। प्रशासकपिंपाखें वा राजनीतिकपाखें छुंकथंया दबाव दइमखु। न्याय निसाफ यायेगु विधि नं न्ह्यथने ।

यदि छुंकथं खुँ ज्वन धाःसा वयात छथुं दण्ड बीमखु। सरकारी कर्मचारी व हाकिमपाखें नं वयात दण्ड बीमखु। दकलय् न्हापां वं खूगु खः कि मखु धकाः छानविन याइ । थुकिया लागिं न्हापां विनिश्चय महामात्य (मुख्यमन्त्री) याथाय् छ्वइ । अनं छानविन याइ । खुँ मुखुसा त्वःती । खुँ सावित जूसा बोहारिकायाथाय् छ्वइ । अन नं वया छानविन याइ । अन खुँ प्रमाणित मजूसा त्वःता बी । खुँ प्रमाणित जूसां सुत्रधारयाथाय् छ्वइ । थनं नं खुँ प्रमाणित मजूसा त्वःता बी । खुँ प्रमाणित जूसा अष्टकुली करुह (च्याम्हसिया विधायकमण्डल) या जिम्मा बी । इपिंपाखें छानविन जुइ । छानविनया झ्वलय् खुँ सावित मजूसा त्वःता बी । खुँ सावित जूसा सेनापति (प्रधानमन्त्री)या ल्हातय् छ्वयाबी । सेनापतिं उपराजायाथाय् अले उपराजां राजायाथाय् छसिकथं छानविन यायां छ्वइ । जुजुयाथाय् नं खुँ खनेमंत धाःसा त्वःती । खुँ सावित जूसा ऐन सवाल सफूकथं दण्ड सजाय बी ।

वजनी गणतन्त्र संघीय प्रणाली कथं न्ह्यात । इपिं सकलें संगठित । सदां मिले जू । सकलें नैतिकवान । उकिं वज्जी गणतन्त्रया कीर्ति छचालं नां दं । इमिसं सदां न्हय्गू सुत्रीय नियम पालना याः । गुगु थुकथं दु। न्हियान्हिथं मुनेगु। सकलें मिले जुयाः मुनेगु। सभय् नं मिले जुया च्वनेगु। मिले जुया दनेगु। सकसियां खँ न्यनाः निर्णय याइगु। अप्रज्ञापनयात प्रज्ञापन मयाइगु। प्रज्ञापनयात नालाः कायेगु, न्हापाया वज्जीपिंसं दयेकातःगु नियम धर्मयात सम्मानकथं नालाः कायेगु, बैंस वने धुंकूपिं हनेबहपिंत हनाबना यायेगु, गौरव तयेगु, इमिगु कीर्ति, बुद्धि नाला कायेगु, सुं नं कूलस्त्री वा कूल कुमारियात छुं कथं जबर्जस्ती मयायेगु, बलात्कार वा दुब्र्यवहार मयायेगु, इमिगु गुलि नं पूज स्थान दु, उकिया सत्कार सम्मान यायेगु ।

न्हापानिसें न्ह्याकाच्वंगु धार्मिक पूजाया हरण मयायेगु। वर्तमानया अरहतपिनि धार्मिक रक्षा यायेगु। भविष्यय् नं छुंकथं विघ्न बाधा मयायेगु। वज्जी गणराज्यया उक्काचेल, कोटिगाम, नदिक, बेलुबगाम, मण्डगाम, भोगनगर, पुण्बविचिर, पुब्बबिजजन व वग्गुमुदानदी यानाः झिंस्वंगू नगर व गां दु। थन सदां सुभिक्ष हे जू धइगु नं मदु। इलय् ब्यलय् दुर्भिज्ञ नं ब्वलं । थुगु इलय् नं सकलें मिले जुयाः जीवन न्ह्याकी ।

थुकथं जक मखु। थःगु ज्याखँय् नं सदां न्ह्यःने न्ह्याइ । उगु इलय् गंगाया टतय् बन्दर गाह दु। थुकि बछि वज्जी गणराज्यया ब्व लाः । बछि ब्व मगढ राज्ययागु खः । अन पहाडं सामान पैठारी याइ । पैठारी सामान कायेत वज्जीया जनता सदां याकनं थ्यनी । संघीय गणतान्त्रिक राज्य जूगुलिं वज्जीइ शान्ति सुरक्षा दु। सकलें आत्मनिर्भर । नैतिकवान जू । थुकिं यानाः राज्ययात समृद्ध राज्य दयेका बिउगु दु ।

सम्बन्धित बुखँ

LEAVE YOUR COMMENTS