चिनियाँ राष्ट्रपतिया सन्देश
‘झीसं धुँ व कीकाय् विरुद्धया छक्वलं पलाः ल्ह्वनेमाः ।’ – चिनियाँ राष्ट्रपति सि चिनफिङ
चिनियाँ कम्युनिष्ट पार्टीया महासचिव व चीनया राष्ट्रपति जुइवं सि चिनफिङं चीनय् व्यापक सुधार हयेगु बचं बियादीगु खः । वय्कःया न्हापांगु सम्बोधनय् पार्टी दुने जुयाच्वंगु अनैतिक गतिविधिप्रति संकेत यासें उकी सुधार यायेमाःगु खँय् बः बियादिल । पार्टी दुने व चिनियाँ सेनाय् अप्वयाच्वंगु भ्रष्टाचार व चरम अनियमितता विरुद्ध ल्वायेमाःगु खँ न्ह्यथनादीगु खः । वय्कलं पार्टी दुनेया थज्याःगु गतिविधि नियन्त्रण यायेगु ज्या तसकं हाथय्पूर्ण जूसां थम्हं उकी फक्व कुतः यायेगु विश्वास प्वंकादीगु खः । राष्ट्रपति सिं पार्टी दुनेया उच्च पदाधिकारीनिसें क्वय्या तहय् च्वंपिं पदाधिकारीतय्त संकेत यासें धुँ व किकाय्त विरुद्ध छक्वलं पलाः ल्ह्वनेगु धकाः धयादीगु धापू तसकं चर्चित जूगु खः ।
‘पार्टी दुने ज्या याइगु तरिका चीधंगु विषय मखु । यदि झीसं थज्याःगु बांमलाःगु प्रवृत्तियात सम्बोधन मयासे थुकीयात विकास जुइ बीगु खःसा थुकिं पार्टी व जनताया दथुइ पःखाः थनाबी । थुकिं झीगु हाः झीगु सहारा व झीगु बः तनावनी ।’ राष्ट्रपति जुइ छुं ई न्ह्यः यानादीगु छगू सम्बोधनय् सि चिनफिङं प्वंकादीगु बिचाः खः, थ्व ।
सन् २०१२या अन्त्यपाखे च्वंगु चिनियाँ कम्युनिष्ट पार्टीया १८ क्वःगु राष्ट्रिय परिषद्या मुँज्या लिपा राष्ट्रपति सिया कार्ययोजनाकथं सुरु जूगु भ्रष्टाचार विरुद्धया अभियानं आपालं पार्टीया नेता व कार्यकर्तातय्त कारवाही यायेधुंकूगु दु । पार्टीया पदधारण यानाः वा मेगु उच्च पदय् च्वनाः भ्रष्टाचार नापं पदीय आचरणया दुरुपयोग याःगु धासें लखौं मनूतय्त कारवाही याःगु दु ।
अभियान अन्र्तगत चिनियाँ सेनाया उच्च अधिकृतत, पार्टीया पोलिटब्युरो दुजःत नापं सरकारी संस्थाया उच्च अधिकारीत कारवाहीया शिकारय् लयेधुंकूगु दु । नापं निगू लखं मल्याक पार्टीया कार्यकर्तातय्त कारवाही स्वरुप पार्टीपाखें चेतावनी, बँ पुइकेगु व पार्टीया पदपाखें घटुवा यायेधुंकूगु दु ।
सिया बिचाः धइगु हे जनता व पार्टी दथुइया स्वापू क्वातुया च्वनेमाः, उकिं जनताया पक्षय् ज्या यायेमाः धइगु खः ।
थ्वहे धापू वय्कलं नेपाः भ्रमण यानादीगु इलय् सत्तारुढ नेपाल कम्युनिष्ट पार्टीया नेतातय्त ध्वाथुइकेगु कुतः यानादीगु दु ।
भ्रष्टाचार विरुद्धया अभियान सन् २०१२या डिसम्बरय् सिचिवान प्रान्तया पार्टीया उप सचिव लि छुनछङयात कारवाही यानाः न्ह्याःगु खः । वयां लिपा च्याङसि प्रान्तया उप गभर्नर याव मुगेन, हुपे प्रान्तया उप गभर्नर क्वो यउमिङ, पुलाम्ह सहायकमन्त्री लि तोङसन्ङ, पुलाम्ह पोलिटब्युरो दुजः नापं केन्द्रीय सैनिक परिषद्या उप सभापति चउ योङखाङ, चाइना पेट्रोलियमया प्रमुख अधिकृत च्याङ चेमिन लगायत उच्च तहया पदाधिकारीत कारवाहीलय् लाःगु खः ।
चीनया तसकं नां जाःगु थ्री गज्र ड्यामय् अनियमितता जूगु ठहर यासें क्वाङचाउया पार्टी प्रमुख वाङ छिङल्याङ, युनाना प्रान्तया प्रमुख पाइ इनफे, उप गभर्नर सन फेफिङयात नं ज्वंगु खः । राष्ट्रपति सि जिनफिङं भ्रष्टाचार विरुद्धया अभियानय् तःतधंपिं पदाधिकारीत व पार्टीया कार्यकर्तातय्त कारवाही यायेगु नाप मेमेगू सामाजिक सुधारया ज्या नं नाप नापं यंकादीगु खः ।
सिया कार्यकाल लिपा कानूनी प्रक्रियायात पारदर्शी यायेगु, कार्यपालिकाया ज्या सामान्य मनूतय् पहुँचयात अप्वयेकेगु, सरकारी कर्मचारीतय् अझ व्यावसायिकतापाखे यंकेगु लगायत पलाः ल्ह्वंगु दु । अथेहे बांलागु खाद्य सुरक्षाया विषय प्रत्यक्ष रुपं छगू अर्ब जनसंख्याया स्वास्थ्य नाप सरोकार दुगु विषय जूगु धासें चिनियाँ सरकारं थुकी विषेश योजना दयेकाः न्ह्याः वंगु दु ।
भ्रष्टाचार निसें कयाः प्रत्येक नागरिक नाप तप्यंक लिच्वः लाइगु स्वास्थ्य तकया विषयलय् सि जिनफिङया कार्यकालय् जूगु उल्लेख्य ज्या मध्ये ला । सिया बिचाः धइगु हे जनता व पार्टी दथुइया स्वापु क्वातुया च्वनेमाः, उकीं जनताया पक्षय् ज्या यायेमाः धइगु खः । थ्वहे धापु वय्कलं नेपाः भ्रमण यानादीगु इलय् सत्तारुढ नेपाल कम्युनिष्ट पार्टीया नेतातय्त ध्वाथुइकेगु कुतः यानादीगु खः ।
वय्कलं धयादीगु खः, ‘चिनियाँ कम्युनिष्ट पार्टीया अनुभव कथं पार्टी दुने स्वच्छता व सुशासन महत्वपूर्ण जू । थ्व जूसाः जक पार्टी व जनता दथुइ बांलागु स्वापु दयाच्वनी ।’राजनीतिक उपलब्धी लिपा नं जनतायात उकीया अनुभुति यायेमफुसा चीन समाजवादपाखे उन्मुख जुइमफइगु खँ राष्ट्रपति सि नं बः बियादीगु खः ।
वास्तवय् चिनियाँ राष्ट्रपतिं नेपाःया नेतातय्त बीत स्वःगु सुझाव थ्वहे खः । थन राजनीतिक हिउपाः वःगु दु । संघीय लोकतान्त्रिक गणतन्त्र कथं नेपाः हिलेधुंकूगु दु । तर अज्याःगु परिवर्तनया अनुभव प्रत्यक्ष रुपं जनतां आभाष यायेमफुसा नेपाः समाजवादपाखे उन्मुख जुइफइमखु ।
संविधानय् समाजवाद उन्मुख जक च्वयेवं देशय् समाजवाद लागु जुइमखु, उकीया निंतिं सरकारं जनताया निंतिं ज्या यायेमाः । जनताया निंतिं ज्या यायेगु खःसा दकलय् न्हापां सत्ताय् च्वंपिं पार्टीतय्सं थःगु पार्टीया आचरणय् सुधार हयेमाः । पार्टी दुने सुधार हयेफःसा जक उगु दलं नेतृत्व यानाच्वंगु सरकारं सुशासन कायम यायेफइ ।
चिनियाँ राष्ट्रपति सिया नेपाः भ्रमणया झ्वलय् वय्कलं थःम्ह कार्यान्वयन यायेधुंकूगु व यानाच्वंगु ज्याखँया बारे अनुभव कनादीगु खः । जनतानाप प्रत्यक्ष स्वापु दुगु ज्या यानाः उकीया आभाष याकेगु, सरकार व पार्टीयात भ्रष्टाचार मुक्त यानाः सुशासन कायम याःसा जक नेपाः सरकारं बीयाच्वंगु ‘समृद्ध नेपाल, सुखी नेपाली’या नारा साकार जुइ ।
नेपाःया नेतातय्त सुझाव बियादीम्ह चिनियाँ राष्ट्रपति सि चिनफिङया छपु धापु थन सान्दर्भिक जुइ, ‘सुख अथें वइगु मखु अले म्हगसः थवंथहे पूवनीमखु । उकीया निंतिं झीसं मिहिनतपूर्व ज्या यायेमाः । ज्या यायेगु हे दकलय् सम्माननीय, महान व गुणयुक्त बिचाः खः धकाः थुइकेमाः ।’
LEAVE YOUR COMMENTS