ने. सं. ११४३ चौलाथ्व पारू -

जापानया एनिमेशन स्टुडियोय् पेट्रोल छ्वाकाः मि च्याकाबिल

२३ म्ह सित, तःम्ह घाःपाः

जापानया क्योटाय् च्वंगु छगू एनिमेसन स्टुडियोय् मि च्यानाः म्होतिं नं २३ म्हेसिया ज्यान वंगु दुसा दर्जनौं घाःपाः जूगु दु । प्रहरीयात उद्ढृत यासें स्थानीय सञ्चार माध्यमतय्सं धाःकथं छम्ह मनू ‘क्याटो ऐनिमेशन को’ स्टुडियोय् दुहां वंगु व वं हे पेट्रोल छ्वाकाः मि च्याकाबिउगु खः ।

उम्ह मनू ४१ दँ दुम्ह जूगु खँ धाःगु दु । नां सीमदुनिम्ह उम्ह मनूयात प्रहरीं ज्वनेधुंकूगु दु । जापानी टेलिभिजन एनएचकेया कथं छुं मनूतय् अवस्था म्हिगः बहनी तक सीमदुनि । स्टुडियो तयातःगु स्वतँ जाःगु उगु भवनय् स्थानीय ई कथं सुथय् १०ः३० बजे मि च्याःगु खः । बिबिसीं धाःकथं मि च्यायेवं तःधंगु विस्फोटया सः नं तायेदुगु खः ।

‘छम्ह मनुखं तरल पदार्थ छ्वकाः उकी मि तयाबिल’ स्थानीय प्रहरी प्रवक्तां एएफपीयात धाःगु दु । एनएचकेया कथं उम्ह मनुखं मि तयेगु झ्वलय् ‘आः छिपिं सी हुँ’ धयागु आशयया टिप्पणी याःगु खः । उम्ह मनूया स्टुडियोलिसे छु सम्बन्ध दु धयागु सीमदुनि ।जापानया प्रधानमन्त्री सिन्जो आबें थुगु घटनाप्रति खेद प्वंकुसें थुकिं यानाः जूगु पीडा शब्दं प्वंकेफइमखु धयादीगु दु ।

वय्कलं मदुपिंत श्रद्धाञ्जली देछायादीगु दु ।मि च्याकाबिउगु क्याटो एनिमेसन् सन् १९८१ य् स्थापना जूगु स्टुडियो खः । थन ‘के–अन’ व ‘द मेलन्कली अफ हारुही सुजुमिया’ थेंज्याःगु लोकंह्वाःगु एनिमेशन कार्यक्रम दयेकूगु खः । थ्व घटना लिपा क्याटो एनिमेशनं दयेकूगु थीथी सामग्रीया तस्बिर तयाः प्रशंसकतय्सं सामाजिक सञ्जालय् थुगु घटनायात कयाः आश्चर्य व तं प्वंकाच्वंगु दु ।