ने. सं. ११४३ चौलाथ्व सप्तमी -

कोरोना विरुद्धया रुसी खोपय् आशंका आधारहीन : रुस

एजेन्सी – रुसं दयेकूगु कोरोना भाइरस संक्रमण विरुद्धया खोपया सुरक्षायात कयाः अन्तर्राष्ट्रिय रुपय् चिन्ता प्वंकेगु ज्या जुयाच्वंगु दुसा रुसं धाःसा थज्याःगु चिन्ता आधारहीन धाःगु दु ।

रुसं मंगलवाः थःगु देय्या नियामक निकायं कोरोना भाइरस विरुद्ध रुसय् हे विकसित याःगु छगू खोपयात स्वीकृति बिउगु खँ धाःगु दु। थ्व खोप निला स्वयां म्हो ई जक मनूतय्त परीक्षण याःगु दु। विज्ञतय्सं रुसं थुलि याकनं खोप दयेकूगु धयागु खँय् हे शंका प्वंकाच्वंगु दु। जर्मनी, फ्रान्स, स्पेन व अमेरिकां थज्याःगु खोपयात कयाः सतर्क जुइत धाःगु दु ।

थज्याःगु चिन्ता प्वंका हयेवं रुसया स्वास्थ्यमन्त्री मिखाइल मुराश्कों रुसी समाचार एजेन्सी इन्टरफ्याक्स लिसे खँ ल्हासें धयादीगु दु, ‘विदेशी पासापिं रुस वासःया प्रतिस्पर्धा न्ह्यःने वनकि जुइगु फाइदाया बारे जानकार जुल थेंच्वं, उकिं उमिसं थज्याःगु खँ ल्हानाच्वंगु दु, गुगु विल्कुल आधारहीन खः ।’

वय्कलं खोप याकनं हे उपलब्ध जुइगु व वइगु निवाः दुने हे खोपया न्हापांगु उत्पादन वइगु व थ्व दकलय् न्हापां चिकित्सकतय्त हे बीगु खँ धयादीगु दु। रुसी अधिकारीतय्सं वइगु अक्टोवरनिसें तःधंगु ल्याखय् मनूतय्त खोप बीगु सुरु यायेगु योजना दुगु खँ धयाच्वंगु दु । रुसी राष्ट्रपति भ्लादिमिर पुटिनं मंगलवाः खोप विकसित यानागु घोषणा यानादीगु खः । थ्व खोप प्रभावकारी जूगुव थुकी प्रतिरोध क्षमता नं बल्लाःगु दावी वय्कलं यानादीगु खः । वय्कलं थः म्ह्याय् यात हे थ्व खोपया परीक्षण यानागु जानकारी नं बियादीगु खः ।

मेखे विश्व स्वास्थ्य संगठनं थ्व खोप बारे समीक्षा यायेत थःपिंसं रुसी अधिकारीतय्त स्वापू तयाच्वनागु खँ धाःगु दु। मस्कों थ्व खोपया नां स्पुतनिक तयेगु खँ धाःगु दु। थ्व खोप विश्व स्वास्थ्य संगठनं स्वंगूगु चरणय् परीक्षण जूगु धकाः सूचिकृत याःगु खुगू खोपतय् धलखय् मदु । थ्व खोपयात कयाः अमेरिकाय् जक मखु युरोपय् नं न्ह्यसः थना हयाच्वंगु दु। जर्मनीया स्वास्थ्य मन्त्री येन्स स्पानं धयादीगु दु, ‘लखौं मनूतय्त खोप बीगु सुरु यायेगु धयागु खतरनाक ज्या खः, छाय् धाःसा थुकी छुं खराबी दत धाःसा खोपप्रति विश्वास हे मदयावनी ।’

‘जिमित गुलि जानकारी वःगु दु, उकिया आधारय् छु धायेफु धाःसा खोपया उचित परीक्षण जूगु मदुनि… न्हापां खोप उत्पादन यायेगु मखुकि छगू सुरक्षित खोपया विकास यायेगु आवश्यक दु’ वय्कलं धयादीगु दु ।

मेखे छुं देशं धाःसा रुसया घोषणायात लसकुस याःगु दु। फिलिपिन्सया राष्ट्रपति रोड्रिगो डुटेर्टें थःम्हं हे उगु खोपया परीक्षण यायेगु धयादीगु दु। वय्कलं धयादीगु दु, ‘जितः विश्वास दु छिकपिंसं (रुसं) दयेकूगु खोप धाथें हे मानवताया निंतिं असल खः । जि थुकिया परीक्षण याःम्ह न्हापांम्ह व्यक्ति जुइ ।’ अथेहे इजरायलं यदि थ्व गम्भीर उत्पादन खःसा न्यायेत सम्झौता यायेगु खँ धाःगु दु ।