यमनय् न्हूपिं मन्त्रीतय्त मिसाइल आक्रमण

एजेन्सी – यमनया दक्षिणी लागय् लाःगु एडन सहरया विमानस्थलय् हुथी विद्रोहीतय्सं याःगु आक्रमणय् लानाः म्होतिं नं २२ म्हेसिया ज्यान वंगु दुसा न्यय्म्हं मल्याक घाःपाः जूगु दु । यमनय् गठन याःगु न्हूगु मन्त्रिपरिषद्या दुजःपिं साउदी अरबं च्वनावःगु छगः विमान दिकेहःगु छुं ई लिपा हे विस्फोट जूगु खः । तर थ्व घटनाय् प्रधानमन्त्री लिसें मन्त्रिपरिषद्या सकलें दुजःपिं सकुशल दुगु खँ धाःगु दु। घटनाय् लानाः सीपिं विमानस्थलया अधिकारीपिं व ग्वाहालिमित जूगु खँ धाःगु दु । यमनया सुचनामन्त्री हूथी विद्रोहीतय्सं कायरतापूर्वक आतंकवादी ज्या याःगु द्वपं बिउगु दु ।

भिडियोय् विमानं यात्रुत कुहां वयाच्वंगु इलय् तःधंगु विस्फोट जूगु खनेदुगु खः । मन्त्रीतय् लसकुसया निंतिं थ्यंगु भिड एयरपोर्ट टर्मिनलपाखें कुँ त्याःत्याः पिहां वःगु खनेवं भागमभाम जूगु खः । थ्वयां छुं ई लिपा हे गोली चले जूगु सः नं तायेदुगु खः । समाचार संस्था एएफपीया संवददातां थःम्हं म्होतिं नं निक्वः विस्फोट जूगु ताःगु खँ धाःगु दु। साउदी अरबया छगू टेलिभिजन च्यानलय् प्रसारण जूगु भिडियोय् धावनमार्गय् क्षेप्यास्त्र आक्रमण जुइवं विस्फोट जूगु खः ।

हुथी विद्रोहीतय् थ्व आक्रमण लिपा हुथीतय् नियन्त्रणय् दुगु यमनया राजधानी सानाय् बुधवाः हे हवाई आक्रमण जूगु दु। हुथीतय्सं सरकारया नियन्त्रणय् दुगु एडेन सहरया विमानस्थलय् आक्रमण याःगु छुं घौ लिपा हे सानाय् आक्रमण याःगु खः । यमन सरकारया समर्थन याना वयाच्वंपिं साउदी नेतृत्वया गठबन्धनं थ्व हवाइ आक्रमण याःगु खँ धाःगु दु ।

सन् २०१५ निसें यमन द्वन्द्वय् लानाच्वंगु दु । सउदी अरबया नेतृत्वय् दुगु अरब राष्ट्रतय् पुचलं हुथी विद्रोहीतय्त पराजित यायेगु व राष्ट्रपति अब्दराबा मन्सुर हादीया शासन पुनस्थापित यायेगु निंतिं सैन्य कारवाही यायेगु सुरु यायेवं यमनय् द्वन्द्व तच्वःगु खः । थ्व हे द्वन्द्वःया कारणं यमनय् १ लाख १० हजार स्वयां मल्याक मनूतय् ज्या वनेधुंकूगु दुसा लखौं मनूत नये मखंका च्वनेमालाच्वंगु दु ।