लिभरपुल व टोटनह्याम सेमिफाइनलय्

च्याम्पियन्स लिगया सेमिफाइनलय् लिभरपुलं बार्सिलोना व आयाक्सं टोटनह्याम नाप धेंधेंबल्ला याइगु जुइगु दु । लिभरपुल एफसी पोर्टोयात बुकाः सेमिफाइनल प्रवेश याःगु खःसा टोटनह्याम अवे गोलया आधारय् म्यानचेस्टर सिटीयात लिउने लाकाः सेमिफाइनलय् थ्यंगु खः । थ्वयां न्ह्यवः बार्सिलोनां म्यानचेस्टर युनाइटेड व आयाक्सं युभेन्टसयात बुकाः सेमिफाइनलय् थ्यनेधुंकूगु खः ।

प्रिमियर लिगया शीर्ष थासय् लानाच्वंगु लिभरपुलं पोर्चुगिज क्लब एफसी पोर्टोयात क्वाटरफाइनलया निगूगु लेगय् ४–१ गोलं बुकल । न्हापांगु लेगय् पोर्टोयात २–० गोलं बुकूगु लिभरपुल समग्रय् पोर्टोयात ६–१ गोलं बुकाः सेमिफाइनलय् थ्यंगु खः । न्हापांगु हाफया २६ औं मिनेटय् साडियो मानेया गोेलं अग्रता काःगु लिभरपुलं निगूगु हाफय् स्वंगू गोल यात ।

कासाया ६५ औं मिनेटय् मोहम्मद सलाह, ७७ औं मिनेटय् रोर्बटो फिर्मिनो व ८४ औं मिनेटय् भान डिजिकं गोल याःगु खः । एफसी पोर्टोया निंतिं छगू जक गोल निगूगु हाफया ६५ औं मिनेटय् मिलटाओं यात । मेगु क्वाटरफाइनलय् अवे गोलया आधारय् म्यानचेस्टर सिटीयात स्तब्ध यानाः टोटनह्याम न्हापांखुसी च्याम्पियन्स लिगया सेमिफाइनलय् थ्यंगु खः ।

न्हापांगु लेगय् सिटीयात १–० गोलं बुकूगु टोटनह्याम निगूगु लेगय् ४–३ गोलं पराजित जूसा, समग्रय् ४—४ गोलया बराबरी जूगुलिं अवे गोलया आधारय् सेमिफाइनलय् थ्यंगु खः । न्हापांगु हाफया २१ मिनेट दुने न्यागू गोल जूगु कासाय् निगूगु हाफय् थप निगू गोल जुल ।

सम्बन्धित बुखँ

LEAVE YOUR COMMENTS