ने. सं. ११४४ ञलाथ्व पुन्हि - येँया: पुन्हि

रुस विश्वकप छुं तथ्य

विश्व फुटबलया महाकुम्भ रसिया विश्वकप फुटबल नं औपचारिक रुपं क्वचाल । वंगु जेठ ३१ गते रुसया राजधनी मस्कोस्थित लुझनिकी रंगशालाय् बःचाधंगु औपचारिक ज्याझ्वःलिपा आयोजक रुस व साउदी अरबया दथुइ जूगु न्हापांगु कासालिसें शुरु जूगु विश्वकप फ्रान्सयात निक्वःखुसी विश्व विजेताया रुपय् कासें औपचारिक रुपं क्वचाल ।

विश्व फुटबल महासंघया २१ औं संस्करण रसिया विश्वकप उपाधिया निंतिं वंगु आइतवाः जूगु कासाय् पूर्व विजेता फ्रान्सं क्रोएसियायात ४–२ गोल अन्तरं बुकाः निक्वःखुसी उपाधि ल्हातय् लाकूगु खः । सन् १९९८ य् फ्रान्सं थःगु हे भूमिइ जूगु कासाय् विश्व फुटबलया महारथी नापं साविकया विजेता ब्राजिलयात ३–० गोलं बुकाः न्हापांखुसी विश्वकप उपाधि ल्हातय् लाकूगु खः ।

नीदँ न्ह्यः थःगु हे भूमिइ जूगु विश्वकपया इलय् नं फ्रान्स क्रोएसियायात सेमीफाइनलय् बुकाः फाइनलय् दुहां वंगु खः । उगु इलय् फ्रान्सं क्रोएसियायात २–१ या गोल अन्तरं बुकूगु खः । क्रोएसिया धाःसा न्हापांखुसी विश्वकप फुटबलया फाइनलय् थ्यंगु खः । क्रोएसियाया थ्व प्रस्तुती विश्व फुटबलय् आतकया दकलय् सर्वोकृष्ट खः । सन् १९९८ य् फ्रान्सं थःगु हे भूमिइ जूगु विश्वकप डिडिएर डेसच्याम्पया कप्तानीइ फ्रान्सं विश्वकप उपाधि त्याकूगु खः ।

फ्रान्सं निक्वःखुसी विश्वकप उपाधि त्याकूबलय् डेसच्याम्प प्रशिक्षकया भूमिकाय् दुगु खः । थ्व ल्याखं छम्ह कासामि व प्रशिक्षकया फरक भूमिकाय् विश्वकप उपाधि त्याकूम्ह डेसच्याम्प स्वम्हम्ह व्यक्ति जूगु दु । थ्व स्वयां न्ह्यः न्याक्वःतक विश्वकप उपाधि त्याकेधुंकूगु ब्राजिलया मारियो जगाले व जर्मनीया महान् फुटबलर नापं फुटबल लेजेन्ड फ्रेन्ज बेकेनबाउरं छम्ह कासामि व प्रशिक्षकया फरक भूमिकाय् विश्वकप उपाधि त्याकाः इतिहास च्वयेत सफल जूगु खः ।

ब्राजिलया जगालों सन् १९५८ व १९६२ या निगू विश्वकपय् कासामिया रुपय् व १९७० लय् प्रशिक्षकया भूमिकाय् विश्वकप उपाधि त्याकूगु खःसा तत्कालिन पश्चिम जर्मनीया बेकेनबाउरं सन् १९७४ य् कासामिया रुपय् व सन् १९९० लय् प्रशिक्षकया रुपय् फरक भूमिकाय् विश्वकप उपाधि त्याकेगु इतिहास च्वयेत सफल जूगु खः ।

फ्रान्सं विश्वकप उपाधि वापत ६ किलो लुँया ट्रफीलिसें ३८ मिलियन डलर (४ अर्ब १० करोड तका) बराबरया पुरस्कार नं प्राप्त याःगु दु । अथे हे उपविजेताय् सीमित क्रोएसियां २८ मिलियन (३ अर्ब १० करोड) प्राप्त याःगु दुसा इंग्ल्याण्डयात बुकाः स्वंगूगु थाय् प्राप्त याःगु बेल्जियमं निगू अर्ब ९८ करोड व इंग्ल्याण्डं २ अर्ब ३७ करोड तका दां ल्हातय् लाकूगु दु ।

अथे हे अन्तिम च्यागुलिइ दुहां वनेत सफल उरुग्वे, ब्राजिल, रुस व स्वीडेन प्रत्येकं १ अर्ब ७२ करोड, अन्तिम झिंखुगुलिइ दुहां वनेत सफल पोर्चुगल, अर्जेन्टिना, स्पेन, जापान, मेक्सिको, कोलम्बिया, डेनमार्क व स्वीट्जरल्याण्ड प्रत्येकं १ अर्ब २९ करोड व समूह चरणं पिहां वंगु झिंखुगू देय् प्रत्येकं ८६ करोड ३२ लाख डलर प्राप्त याःगु दु ।

फिफां थ्व स्वयां न्ह्यःया विश्वकपय् स्वयां रसिया विश्वकपय् पुरस्कार राशि नं अप्वयेकूगु खः । थुगुसीया विश्वकप ४०० मिलियन डलर बराबरया पुरस्कार राशि दुगु खः । विश्वय् दकलय् लोकंह्वाःगु विश्वकप फुटबलया इतिहास शुरु जूगु छगू शताब्दी थ्यनेत्यंगु दु । सन् १९३० य् उरुग्वें शुरु जूगु विश्वकप रुस विश्वकप तक थ्यंगु इलय् ८८ दँय् थ्यनेधुंकूगु दु ।

थ्व ८८ दँया इतिहासय् अर्थात २१ औं संस्करणतक थ्यंगु इलय् मुक्कं च्यागू हे जक देशं विश्वकप उपाधि ल्ह्वने खंगु दु । न्हापांगु संस्करणया उपाधि आयोजक उरुग्वें त्याकूगु खःसा वयां लिपा इटाली (सन् १९३४ व १९३८), उरुग्वे (१९५०), तत्कालीन पश्चिम जर्मनी (१९५४, १९७४, १९९० व २०१४), ब्राजिल (१९५८, १९६२, १९७०, १९९४ व २००२), अर्जेन्टिना (१९७८ व १९८६), इटाली (१९८२ व २००६), इंग्ल्याण्ड( १९६६), फ्रान्स (२००२), स्पेनं (२०१०) त्याकूगु दु ।

अथे हे विश्वकपय् नेदरल्याण्ड, तत्कालीन चकोस्लोभाकिया, हंगेरीयात दकलय् अभागी टिमकथं कायेगु याः । नेदरल्याण्ड स्वक्वः व चेक व हंगेरी निक्वः निक्वः तक विश्वकपया फाइनलय् थ्यंसां उपाधि धाःसा त्याकेमफुत । २१ औं संस्करणया रसिया विश्वकप रुसया झिंछगू सहरया १२ गू रंगशालाय् मुक्कं ६४ गू कासा जुल ।

३२ गू टिमया मक्कं ७३६ म्ह कासामिं ब्वति काःगु सहभागि टिमयात च्यागू पुचलय् ब्वथलाः लछितक न्ह्याःगु कासाय् ११० कासामिं गोल याःगु दुसा सहभागि दक्वं टिमं गोल यायेत सफल जूगु दु । कासाज्वःछि १६९ गोल जूगु दुसा प्यम्ह कासामिं ह्याउँगु कार्ड व २१९ कासामिं म्हासुगु कार्डया सामना यायेमाल ।

मुक्कं १२ म्ह कासामिं आत्मघाती गोल याःगु कासाय् २२ म्ह कासामिं पेनाल्टीपाखें गोल यायेत सफल जुल । फाइनलय् क्रोएसियाया मारियो मान्डजुकिचं याःगु आत्मघाती गोल विश्वकप फुटबलया इतिहासय् फाइनलय् जूगु न्हापांगु आत्मघाती गोल खः । इंग्ल्याण्डया ह्यारी केन दकलय् अप्वः खुगू गोल याःगु दसा दकलय् अप्वः गोल याःगु टिम बेल्जियम (१६ गोल) खः ।

अथे हे दकलय् अप्वः क्रोएसियां ३५२ क्वः आक्रमण याःगु दुसा दकलय् अप्वः ३,३३६ पास इंग्ल्याण्डं म्हितल । केनं पेनाल्टीपाखें स्वंगू व हेडमार्फत १ गोल याःगु खः । रुस विश्वकपय् रोमेलु लुकाकु (बेल्जियम), क्रिष्टियानो रोनाल्डो (पोर्चुगल) व डेनिस चेरिसभ (रुस), किलियन एम्बाप्पे (फ्रान्स), एन्टोइन ग्रिजम्यान (फ्रान्सं) ४–४ गोल याःगु दुसा खुम्ह कासामिं ३–३ गोल, झिंप्यम्ह कासामिं २–२ गोल व ८२ कासामिं १–१ गोल याःगु दु ।

इंग्ल्याण्डया केनं गोल्डेन बुट, फ्रान्सया केलियन एम्बाप्पें फिफा युवा कासामि, फिफा फेयर प्ले स्पेन, गोलरक्षक थिबाउट कोर्टियस (बेल्जियम) गोल्डेन ग्लोभ, बेस्ट प्लेर लुका मोड्रिक (क्रोएसिया) गोल्डेन बल प्राप्त याःगु दु । समूह चरण व नकआउट नापं यानाः मुक्कं ६४ गू कासा जूगुलिइ समूह चरणय् १२२ गोल जूगु दुसा आत्मघाती गोल १२ गू जुल ।

थुगुसीया विश्वकपय् लियोनल मेस्सी, मोहमद सलाह, जेम्स रोड्रिगेज, थोमस मुलर, मार्को एसेन्सियो, आन्द्रे इनिस्टा, नेयमार थेंज्याःपिं कासामिया प्रदर्शन निराशाजनक जुयाबिल । मेखे ह्यारी केन, भिक्टर लिन्डेलोफ, गोलरिक्षक इगोर अकिनफेभ, मारियो फर्नान्डेज, डियगो लाक्साल्ट, एन्टेनियो ग्रिजम्यान, पाउल पोग्बा, केलियन एमबाप्पे, राफेल भरान, ताकासी इनुई, एडिन्सन काभानी, गोलरक्षक ह्युगो लोरिस थेंज्याःपिनिगु प्रदर्शन च्वछायेबह जुयाबिल ।