संघनायक ज्ञानपूर्णिक भन्ते मन्त

येँ – संघनायक ज्ञानपूर्णिक महास्थवीर मन्त । वसपाेल थौं सुथय् ४:३० ताःइलय् सुमेरु अस्पतालय् मदुगु खः । वसपाेल जलास्येँया ल्वचं कयाः वंगु स्वला न्ह्यव वैशाख १८ गते निसें अस्पतालय् भर्ना जुयाबिज्यानाच्वंगु खः ।

जलास्येँया ल्वचं कयाच्वंम्ह वसपाेलयात लिपा प्राेस्टेट क्यान्सर नं खनेदुगु खँ धाःगु दु ।

८१ दँया वसपाेल दत्या न्ह्यव २०७६ वैशाख १ गते संघनायक जुयाबिज्याःगु खः । वसपाेल नेपाःया न्हयम्हम्ह संघनायक खः । वसपाेल अखिल नेपाल भिक्षु महासंघया पुलांम्ह नायः, विश्वशान्ति महाविहारया प्रमुख नं खः ।

वसपाेलया पार्थिव शरीर दर्शनया नितिं थाैं शुक्रबाः १० बजेनिसें विश्वशान्ति महाविहारय् तइगु जूगु दु । थाैं न्हिनय् १२ बजे भिक्षु संघया बैठक च्वना वसपाेलया अन्त्यस्टियाा बारे क्वःछिगु खँ भिक्षु निग्राेधं कनाबिज्याःगु दु ।

अभिधम्मया व्याख्याता वसपाेलं नेपालभाषाया तःजिगु सिरपाः श्रेष्ठ सिरपाः नं त्याकाबिज्यायेधुंकूगु दु । वसपाेलं नेपालभाषाय् तःगू सफू च्वयाबिज्याःगु दु ।