न्हापांम्ह मिसा न्यायाधीश सिलु सिंहया अन्त्यष्टी

नेपालभाषा टाइम्स
११४० तछलाथ्व पारू
किपा-अर्विन मान सिं / राजेन्द्र मानन्धर

येँ – सर्वोच्च अदालतया न्हापांम्ह मिसा न्यायाधीश सिलु सिंहया अन्तिम संस्कार थाैं थनया शोभा भगवतीया कर्ण दिपय् जुल । मदुम्ह सिंहयात वय्कःया चीधीम्ह काय सितुलाल श्रेष्ठं मि तयादीगु खः । वय्कः म्हिग बहनी वासः यायेगु झ्वलय् मेडिसिटी अस्पतालय् मदुगु खः ।

सर्वोच्च अदालतया न्हापांम्ह मिसा न्यायाधीश सिंहयात छवाः न्ह्यः आकाझाकां ‘ब्रेन एटेक’ जुयाः अस्पतालय् भर्ना याःगु खः । ८४ दँ दुम्ह सिंह नांजाःम्ह वाम बुद्धिजीवी एवं समालोचक प्रो. माणिकलाल श्रेष्ठया जहान लिसें नेपालभाषाया न्हापांगु न्हिपौ ‘नेपालभाषा पत्रिका’ या सम्पादक-प्रकाशक फत्तेबहादुर सिंहया म्ह्याय् खः ।

वय्कःयात अन्तिम श्रद्धाञ्जलि प्वंकेत शोभा भगवती नेपालभाषा ख्यःया भाषिक कार्यकर्तात, जनप्रतिनिधत थ्यंगु खः ।