क्यानेडियन नेवाः गुथिया १६ क्वःगु साधारणसभा
येँ(नेपालभाषा टाइम्स)÷क्यानेडियन नेवाः गुथिया १६ क्वःगु वार्षिक साधारण सभा जुल । साधारण सभाया उलेज्या गुथिया नायः प्रकाशलाल प्रधानं त्वाःदेवाय् मत च्याकाः यानादीगु खः ।
गुथिया मिसा पुचःया संयोजक सितार वादक रञ्जना सैंजूं सितारय् मंगल धुन न्यंकुसे न्ह्याःगु ज्याझ्वलय् नायः प्रधानं लसकुस यासें गुथिया ग्वसालय् जूगु थीथी ज्याझ्वः व गतिविधिया बारे जानकारी बियादिसें गुथि स्थापना दिवसया लसताय् भिंतुना नं बियादीगु खः ।
गुथिया मूछ्याञ्जे विमलमान श्रेष्ठं वार्षिक प्रगति प्रतिवेदन न्ह्यब्वयादिसें कोभिड–१९या कारणं भौतिक उपस्थिति प्रत्यक्ष रुपं बांलाक ज्याझ्वः याये मखंसां जूम अनलाइनया माध्यमं थीथी ज्याझ्वः यानागु जानकारी बियादिल । अथे हे दांभरिं राजेन्द्र महर्जनं आर्थिक विवरण न्ह्याब्वयादीगु ज्याझ्वलय् निगुलिं प्रतिवेदन आवश्यक सहलह व संशोधनसहित पारित याःगु खः ।
ज्याझ्वलय् गुथिया संस्थापकद्वय महेश प्रधान व प्रदीपलाल श्रेष्ठं नुगःखँ प्वंकादिसें गुथियात न्ह्यःने यंकेत थीथी सुझाव बियादीगु खः । गुथिया सचिव सुमन राजवंशीं सुभाय् देछानादीगु ज्याझ्वलय् गुथिया ग्वसालय् वंगु लछि न्ह्यः जूगु न्हापांगु नेवाः भ्वय् ज्याझ्वःया थीथी पक्षयात कयाः जानकारी बिउगु खः ।
लिसें वइगु दिनय् गुथिया ग्वसालय् मंकाः कय्तापुजा ज्याझ्वः यायेगु नं जानकारी बिउगु खः ।
LEAVE YOUR COMMENTS