कमजोरी सुचुकेत मेपिंत दोष

मनूत गबलय् थः कमजोर जुइ । अज्याःगु इलय् वं थःगु कमजोरी मालेगु मखसे, मेपिंत दोष बियाः लिचिलेगु याइ । थुकिया ज्वलन्त उदाहरण खः, वर्तमान प्रधानमन्त्री केपी ओलीया धापू ! वंगु छुं दिं न्ह्यः जक प्रधानमन्त्री ओलीं भारतं थःत चीकेगु कुतः यानाच्वंगु धकाः धयादीगु खः । वय्कःया उगु धापूयात कयाः पार्टी दुने जक मखु पार्टी पिने नं छगूकथं मेगु हे माहोल निर्माण जुल । खः थ्व स्वयां छुं दिं न्ह्यः जक सार्वजनिक याःगु नेपाःया नक्साय् कालापानी, लिम्पियाधुरा वलिपुलेक दुथ्याकाः राष्ट्रवादी जुइत ताःलाःम्ह प्रम ओली लिपांगु इलय् पार्टी दुनेलिसें आपालं जनतां थःत मययेकूगु खनाः तिरिमिरि कन । पार्टी दुने थःगु विरोध अप्वयाः वनेवं हाकनं छक्वः जनतां थःत साथ बी ला धकाः प्रम ओलीं भारतं थःत चीकेत स्वःगु धकाः कार्ड वांछ्वःगु खः । तर उगु कार्डयात जनतां पत्याः यायेमफुत । थ्व पालय् जनतां थुकथं छाय् पत्याः मयात थ्व न्ह्यसः थौं ब्वलंगु दु ।

केपी शर्मा ओली प्रधानमन्त्री जूगु इलंनिसें विवादय् लानाच्वंगुलिं खः । प्रम ओलीं गबलें जनताया छेँय् छेँय् पाइपपाखें ग्यास आपूर्ति यायेगु धकाः दुनियाँयात न्हिकेगु ज्या यातसा, गबलें नेपालय् पानी जहाज चले यायेगु धकाः धायेगु यात । तर आतक न नेपालय् पानी जहाज हे चले जुल न त जनताया छेँय् छेँय् पाइपं ग्यास हे थ्यन । ओली सरकार गठन जुइधुंकाः आपालं बेथितिया घटना अप्वया वनाच्वंगु दु। भ्रष्टाचारया सीमां थुलि हा कयाः वनकि उकियात पनेगु कुतः ला गन खः गन अःखबतं उकियात संस्थागत यायेगु ज्या प्रम ओलीया पालय् जुल, नेपाल ट्रष्टया जग्गा थः सतीपिं ब्यापारीयात बीगुलिसें बालुवाटारया जग्गा प्रकरणय् पार्टी महासचिव विष्णु पौडेलयात संरक्षण बीगु ज्या नं जुल ।

उकथं हे विश्वन्यंकं कोरोना भाइरसया संक्रमण अप्वया वनेवं उकियात नियन्त्रण यायेगु तयारीकथं माःगु स्वास्थ्य सामग्री न्यायेगुलिइ आपालं भ्रष्टाचार जूगु समाचार पिदन । तर भ्रष्टाचार यायेगु ज्याय् संलग्न सम्बन्धित मनूतय्त कारवाही यायेगु पलेसा उकियात त्वपुइगु कुतः नं ओली सरकारं यात । कोरोना संक्रमण लिपा उकियात नियन्त्रण यायेगु झ्वलय् सरकारं १० गूअर्ब खर्च जूगु हिसाब क्यन । जनतां उकियात पत्याः मयाः । अःखबतं जनतां उगु ध्यबा गन गुकथं खर्च जुल धकाः पारदर्शी जुइकथं हिसाब क्यनेमाःगु माग यात । तर प्रम ओलीं हिसाब क्यनेगु स्वयां न्हापां कोरोना नियन्त्रण नि जुइबिउ । हिसाब लिपा याये धकाः तसकं हलुका लिसः बियादिल ।

कोरोना संक्रमण लिपा उकियात नियन्त्रण यायेगु झ्वलय् सरकारं १० गू अर्ब खर्च जूगु हिसाब क्यन । जनतां उकियात पत्याः मयाः । अःखबतं जनतां उगु ध्यबा गन गुकथं खर्च जुल धकाः पारदर्शी जुइकथं हिसाब क्यनेमाःगु माग यात । तर प्रम ओलीं हिसाब क्यनेगु स्वयां न्हापां कोरोना नियन्त्रण नि जुइबिउ । हिसाब लिपा याये धकाः तसकं हलुका लिसः बियादिल ।

अथे हे पार्टी दुने नं प्रम ओलीया क्रियाकलापं यानाः पार्टी हे बदनाम जुइगु अवस्था ब्वलंगु विश्लेषण जुयाच्वंगु दु। प्रम ओलीं निगू पार्टी एकीकरण जुइधुंकाः पार्टीया केन्द्रीय कमिटीया बैठक तयेगु ला गन खः गन स्थायी कमिटी व सचिवालयया बैठक तकं तयेगु कुतः मयाः । अथे धइगु पार्टी दुने थः विरुद्ध अभिमत अप्वः दुगुलिं उकथं बैठक तयेत लिबाकाच्वंगु द्वपं पार्टीया उच्चस्तरया नेतातय्सं बीगु यानाच्वंगु दु। आः वयाः प्रम ओली सचिवालय व स्थायी कमिटी निगुलिइ नं थः अल्पमतय् लायेधुंकाः स्थायी कमिटीया बैठक सःतेत बाध्य जूगु जक मखु। पार्टी अध्यक्ष व प्रम निगुलिं पदं राजीनामा बित नं निर्देशन बीगु ज्या जुल । थुकथं स्वयेबलय् प्रम ओली सरकार व पार्टी निगुलिं थासय् कमजोर जुजुं वनाच्वंगु दु। तर प्रम ओलीं उकियात स्वीकार यायेत अझ नं तयार मदुनिगु संकेत खने दयाच्वंगु दु ।

विश्वया आपालं देशय् कोरोना भाइरसया संक्रमणया झ्वलय् भ्रष्टाचार जूगु बुखँ वयाच्वंगु दु। उकथं हे नेपालय् नं कोरोना भाइरस संक्रमणया इलय् आपालं भ्रष्टाचार जूगु खँ सार्वजनिक जूगु जक मखु, स्वास्थ्य सामग्री न्यायेगु झ्वलय् अधिकार तकं मदुम्ह छम्ह सल्लाहकारं निर्णय याःगु खँ नं पिहां वयाच्वंगु दु। उकियात कयाः संसदीय राज्य व्यवस्था समितिं छानविन यायेधुंकूगु दुसा उकी स्वास्थ्य मन्त्रीया बदनियत खनेदुगु दु। तर प्रम ओलीं स्वास्थ्यमन्त्रीया सल्लाहकारलिसें स्वास्थ्यमन्त्रीयात कारवाही यायेगु मखसें उकियात त्वपुइगु कुतः यानाच्वंगु दु। विश्वया थीथी देशय्ब हालवाला मन्त्रीं भ्रष्टाचार याःगु द्वपनय् कारवाही यायेगु ज्या जुयाच्वंगु दुसा नेपालय् धाःसा भ्रष्टाचार जूगु खँ स्पष्ट जुइधुंकाः नं स्वयम प्रधानमन्त्रीं उकियात त्वपुइगु धइगु उगु भ्रष्टाचारय् प्रमया तप्यंक ल्हाः मदु धकाः गुकथं जनतां विश्वास यायेगु?

गुगुं नं देशय् जुइगु बेथितियात पनेगु मुख्य ज्या प्रधानमन्त्री व राष्ट्रया कार्यकारी प्रमुखया खः । तर स्वयम कार्यकारी प्रमुखं हे अज्याःगु ज्यायात तिबः बीगु ज्या जुलधाःसा देशय् भ्रष्टाचार संस्थागत जुइगु स्वाभाविक खः । आः नेपाःया सन्दर्भय् नं थ्व खँ स्पष्ट जुयाबिउगु दु ।

मेता खँ धइगु प्रम ओलीया मन्त्रीमण्डलय् च्वंपिं मन्त्रीतय्गु चहपह स्वयेगु खःसा मन्त्रीमण्डलया वास्तविकता न्ह्यःने वइ । तत्कालीन सूचना तथा संचारमन्त्रीलिसें सरकारया प्रवक्ता गोकुल बास्कोटां सेक्युरिटी प्रेस न्यायेगु झ्वलय् ७० करोड तका कमिसन माःगु अडियो सार्वजनिक जुल ।उगु काण्डयात नं प्रम ओली त्वःपुइत मस्वःगु मखु, पार्टी व आम जनमानसया दथुइ मन्त्रीया कमिसन काण्डयात कयाः आपालं विरोध जुइधुंकाः प्रम ओली बास्कोटायात चीकेत बाध्य जुल ।

उकथं हे विवादय् लानाच्वंम्ह मेम्ह मन्त्री खः अर्थमन्त्री डा. युवराज खतिवडा । थौं स्वयां छुं न्हिं न्ह्यः जक अर्थमन्त्रीं खतिवडां देय् संचालन यायेत आर्थिक संकट जूगु खँ धायेगु यानाच्वंगु खःसा आः वयाः हाकनं अर्थतन्त्रय् गुगुं कथंया समस्या मदुगु खँ धायेगु यानाच्वंगु दु। अर्थ मन्त्रीया बाःछिया दुने वःगु थज्याःगु धापुतिं छु सन्देश बियाच्वन ? उकथं हे अर्थमन्त्री खतिवडां वैदेशिक रोजगारी चायेधुंकूगुलिं नेपाःया ल्याय्म्हपिंत वैदेशिक रोजगारी छ्वयेगु खँ धाःगु दु। अर्थमन्त्री वा सरकारया दायित्व धइगु नेपाःया युवातय्त स्वदेशय् रोजगारीया अवसर श्रृजना यानाः उमित रोजगार बी माःगु खः । न कि वैदेशिक रोजगारया नितिं प्रोत्साहन यायेगु!

कोरोना भाइरस नियन्त्रणया झ्वलय् स्वास्थ्यमन्त्री भानुभक्त ढकाल नं विवादय् लानाच्वंगु दु। स्वास्थ्य सामग्री न्यायेगुलिइ जुयाच्वंगु भ्रष्टाचारं थुकियात यच्चुक क्यनाच्वंगु दु। तर देय्या प्रधानमन्त्री धाःसा थःगु सरकारं तसकं बांलाक ज्या यानाच्वंगु दु धकाः माकः फुइँ क्यनेगु बाहेक मेता छुं याये फयाच्वंगु मदु ।

सम्बन्धित बुखँ

LEAVE YOUR COMMENTS