आः नेमकिपां म्हितेमाःगु भूमिका

पूँजीवादी बन्दोवस्त पाय्छि खः वा समाजवादी बन्दोबस्त पाय्छि खः धइगु खँ विश्वब्यापी रुपं बहसया हे खँ तिनि । पूँजीवादी बन्दोबस्तं याये हे मफुगु आर्थिक उन्नति वा विकास समाजवादी बन्दोबस्तं याना क्यंगु कारणं हे जक थौं देसय् समाजवादी ब्यवस्थाया माग न्ह्यःने वयाच्वंगु खः । यदि पूँजीवादी बन्दोबस्त वा प्रजातान्त्रिक अभ्यासपाखें हे सम्पूर्ण जनजीविकाया समस्या समाधान जुयाच्वंगु खःसा विश्वय् माक्र्सवादी विचारधाराया उदय हे मजुइगु खइ । पूँजीवादया गर्भय् हे समाजवादया जन्म जुइगु खः । संसदीय ब्यवस्थापाखें वा पूँजीवादी बन्दोबस्तपाखें हे जनताया नयेगु, त्वनेगु, पुनेगु व न्हियान्हिथंया आवश्यकतायात पूवंका बीफुगु खःसा अन दुने संघर्ष नं मजुइगु खइ ।

अले असन्तोष व संघर्ष मजूगु थासं न्हूगु विचारधाराया उदय नं जुइ मखु । थथे स्वयेगु इलय् देसय् पूँजीवादी बन्दोबस्त लागू जूवंगु मूल आधार थ्व देय् हे न्हापांनिसें अर्ध उपनिवेश देय् जुयाच्वंगु व थन सामन्ती संस्कार यथेष्ट रुपं लागू जुयाच्वंगुलिं खःसा वयां लिपा धाःसा आः धमाधम थ्व पूँजीवादी बन्दोबस्तं खाली तःमिपिं, पूँजीपति वर्ग व सीमित धनीमानी मनूतय् निंतिं जक ज्या याये फत । अथे जूगुलिं आः धमाधम समाजवादपाखे वनेमाल धइगु न्हूगु व प्रगतिशील धारणा जनमानसय् ब्वलना वयाच्वंगु दु ।आः नकतिनि हे जक नेपाल मजदुर किसान पार्टीया नीच्याक्वःगु केन्द्रीय परिषद् ख्वपय् क्वचाःगु दु ।

उगु परिषदं नं पूँजीवादी बन्दोबस्त सही खत धाःसा समाजवादी धारणा वा माक्र्सवादया उदय हे मजुइगु खँ स्पष्ट याःगु दु । पूँजीवादी बन्दोबस्तं ब्यापक जनताया हित मयाइगु जूगुलिं हे जक समाजवादी धारणा वा माक्र्सवादी विचारधारां थाय् कया यंकाच्वंगु उगु परिषदं निष्कर्ष पिथंगु दु । खय्त ला समाजवादी धारणा लिपा हे जक थ्व विश्वय् खने दयेकः वःगु न्हूगु धारणा खः । माक्र्सवाद लेनिनवाद विश्वय् बहुमत जनताया हित यायेगु, बहुमत जनतायात न्याय यायेगु व बहुमत जनतायात नयेगु, त्वनेगु व रोजगारया ग्यारेन्टी यायेगु धारणा पिहां वःगु खः । मूल आधार हे जनता जुइगु व राज्यया स्वामित्वय् फुक्कं सार्वजनिक साधन श्रोत परिचालन याइगु जुयाः थुकियात विश्वया हे दकलय् उत्कृष्ट विचारधारा कथं नं नालातःगु दु ।

तर थ्व समाजवादी बन्दोबस्त प्रयोगकर्तां गथे यात अथे नं जूवनेफुगु जुयाच्वन ।रुसय् सोभियत संघ गठन जुइधुंकाः नं गोर्भाचोभ, खु्रश्चेभ थेंज्याःपिं पूँजीवादी बन्दोबस्तया पक्षपातीत समाजवादी ब्यवस्थाय् गुप्चतर कथं खने दयेकः वयेवं उगु ब्यवस्था हे पतन जूवंगु खः । आः अन नयेगु, त्वनेगु हानं न्हापा थें हे समस्या खने दयावःगु, मिस्तय्सं नयेगु निंतिं हे थःपिनि म्ह तकं मीमाःगु अवस्था ब्वलंगु व थीथी कथंया विकृति व विसंगति खने दया वयेवं धाःसा समाजवादी बन्दोबस्तया लागिं हाकनं हाकनं सः थ्वयेकेगु यानाहःगु दु । तर समाजवाद अःपुक लागू जुइगु वा वइगु चीज मखु । सारा जनता छप्पँ छधी जुयाः ल्वाये मफुतले समाजवादी बन्दोबस्त हयेगु सम्भावना नं मदु ।

रुसय् सन् १९१७ य् जार सरकारया अन्त्य नापनापं अनया अल्पमत धाःपिं मेन्सेविक सरकार लागू जुल । फेब्रअरी क्रान्तिं उमित सत्ताय् हःगु खःसा लेनिनं लगातार अक्टोवर क्रान्तिया लागिं तयार यानाः उकथं हे लागू यानाः क्यनेवं जक समाजवादी गणतन्त्र वा सोभियत संघ नीस्वंगु खः ।
थथे दुःख, कष्ट व संघर्ष यानाः हयातःगु सोभियत संघया पतन निम्ह प्यम्ह अदृश्य रुपं शक्तिइ वःपिं कम्युनिष्ट धाःपिं नेतातय्पाखें हे जुयावन । चीनय् नं अज्याःपिं हे पूँजीवादी धारणा दुपिं, थः जक नयेत स्वइपिं व मोजमस्तीइ लगे जुइपिं जनताया भावनाया कदर मयाइपिं छुं छुं कम्युनिष्ट नेतात खने दयेकः वःगु खः ।

ल्यू साओ चि अज्याःम्ह हे छम्ह नेता कथं काइ । नेपालय् आः तकं कम्युनिष्ट शासन लागू जूगु मदुनि । तर वर्तमान संविधानय् धाःसा आः देय्यात समाजवादउन्मुख दयेकेगु धकाः थुगु संविधान हे समाजवादउन्मुख संविधान धायेधुंकूगु दु । समाजवादउन्मुख धाःगु समाजवादपाखे धेचूगु धाःगु खः । तर थन पूँजीवादी क्रान्ति हे पूवंगु मखुनि । पूँजीवादी क्रान्तियात सफल यायेवं हे थनया समाजवादी बन्दोबस्त हयेत लालायितपिं छथाय् च्वनाः संघर्षयात निरन्तरता बिउगु खःसा थन समाजवादी आन्दोलन न्ह्यज्याइगु खः । तर अथे जुइ मफुत ।

प्रतिक्रियावादीतय्सं सदां थःपिं हे जक शासन सत्ताय् च्वनेगु निंतिं अनेकौं जालझेल यानाः सत्ता टिके यायेगु कासा म्हिचा च्वनीगु कारणं नं थ्व इलय् सत्ताय् पूँजीवादी बन्दोबस्त न्ह्यःने यंकीपिं हे जक लानाच्वंगु खः । वर्तमान अवस्थाय् नेपाली कांग्रेसया सरकार दु । थ्वयां लिपा कम्युनिष्ट वा एमाले धाःगु पार्टी सत्ताय् वनीगु प्रायः निश्चित दु । तर आः तक नं थ्व एमाले धाःगु पार्टीं थुगु संसदीय ब्यवस्था ध्वस्त यायेगु, थुकियात असफल यायेगु व थुकिया बिरोधय् ल्वानाः समाजवादी आन्दोलन यायेगु खँ पित हःगु मदुनि ।

थःपिं थीथी कथं तःधं जुइत हे जक एमाले वा कम्युनिष्ट नां तयाः फुक्कं आचारण वा दुनेया ब्यवहार फुक्कं पूँजीवादी आचरण यानाच्वंगुलिं नं थ्व इलय् जनतां थुमित कम्युनिष्ट हे खः धकाः पत्याः याये फयाच्वंगु मदु । मनमोहन अधिकारीं अमेरिका वंगु इलय् ला छगू पत्रिकायात थ्व छगू ब्राण्ड वा चिं जक खः धयादीधुंकूगु खँ सार्वजनिक जुयाच्वंगु दु । एमालेया ख्वाः हे जक कम्युनिष्ट तर थुगु पार्टी पूँजीवादी पार्टी हे खः धइगु अध्यक्ष मनमोहनं अभिब्यक्ति बियावंगु यक्वसिनं ब्वनेधुंकूगु दु ।थथे पूँजीवादी ब्यवस्थां याकीगु निर्वाचनय् ब्वति कयाः नं मग्यासें भारतीय विस्तारवाद व अमेरिकी साम्राज्यवादया सदनं तकं बिरोधया सः थ्वयेकाच्वंगु पार्टी धाःसा नेमकिपा खः ।

अथे जुयाः नं गबलें गबलें वयागु अभिब्यक्तियात सदनया रेकर्डं तकं हुया छ्वयेगु प्रस्ताव हयाः हुइकीगु नं याना वयाच्वंगु दु । कानुनी व गैरकानुनी संघर्ष यानाः समाजवादी आन्दोलन मार्फत् समाजवादी बन्दोबस्त हयेगु हे मू लक्ष्य ज्वनाः न्ह्यज्यानाच्वंगु नेमकिपा सदनय् क्रान्तिकारी संसदवाद कथं उपयोग यानाच्वंगु दु । २०३१ सालय् किसान आन्दोलन मार्फत् न्ह्यःने वयाः पार्टीया रुप बिउगु थ्व पार्टीं आः नं सदनय् छम्ह प्रखर प्रतिपक्षी कथं भूमिका म्हिताच्वंगु दु । थ्व छगू आशाया केन्द्र जक मखुसें आपालं नेपाःया कम्युनिष्ट धयातःगु पार्टीया लागिं लँ क्यनीगु लालटिन वा प्रकाश स्तम्भ कथं ज्या यानाच्वंगु पार्टी खः ।