म्यानमारया सैन्य कूयात विश्वन्यंकं निन्दा

एजेन्सी – म्यानमारया जूगु सैनिक कूयात विश्वन्यंकं निन्दा जूगु दु। संयुक्त राष्ट्र संघं नं म्यानमारय् जूगु घटनाय् गम्भीर ध्यानकर्षण जूगु खँ धागु दु। संरासंया महासचिव एन्टोनियो गुटेरसं पितबिउगु वक्तव्यय् सकसिनं प्रजातान्त्रिक मूल्य मान्यता पालना यायेमाःगु खँ धयातःगु दु। वक्तव्यय् म्यानमारया नागरिक व सरकारया शान्ति, दीर्घकालिन विकास, मानवीय पलाः, मानव अधिकार व कानुनी राजया पक्षय् संयुक्त राष्ट्र संघ दुगु खँ धयातःगु दु ।

अथेहे जापानया परराष्ट्र मन्त्रालयं म्हिगः छगू वक्तव्य जारी यासें नेतृ आब साब सुकीयात तुरुन्त रिहा यानाः प्रजातन्त्र पुनस्थापना यायेत इनाप याःगु दु। मन्त्रालयं पितबिउगु वक्तव्यय् जापानं म्यानमारया प्रजातान्त्रिक प्रक्रियायात पूर्ण रुपं समर्थन याना वयाच्वंगु खँ न्ह्यथँसें आः म्यानमार प्रजातान्त्रिक प्रक्रियां लिहां वंगुलिं विरोध यायेमाःगु खँ धयातःगु दु। अथेहे टोकियाय् च्वंगु संयुक्त राष्ट्र युनिभिर्सिटी पिने नं सलंसः विद्यार्थीतय्सं सुकीया रिहाइया माग यासें विरोध प्रदर्शन याःगु दु । म्यानमारया सेनां म्हिगः सुकी लिसें सत्तारुढ  दलया नेतातय्त ज्वनाः दछिया निंतिं संकटकाल घोषणा याःगु खः ।

सेनाया थ्व पलाःयात कयाः संयुक्त राष्ट्र संघ, अमेरिकां नं विरोध याःगु दु। अमेरिकां प्रजातान्त्रिक प्रक्रियाया विरुद्ध वनीगु न्ह्यागु कथंया ज्याया नं विरोध यायेगु खँ धाःगु दु। अमेरिकी विदेशमत्री एन्टोनी ब्लिन्केनं ज्वनातःपिं सकसितं तुरुन्त रिहाइया माग यासें अमेरिका म्यानमारया नागरिकतय् प्रजातन्त्र, स्वतन्त्रता, शान्ति व विकासया पक्षय् दु धकाः धाःगु दु। विदेशमत्री ब्लिन्केनं म्यानमारया सेनां ल्ह्वंगु पलाखं तुरुन्त लिचिलेमाः धकाः नं धाःगु दु। अस्ट्रेलियाया विदेशमन्त्री मेराइस पेनं नं छगू वक्तव्य पितबिसें सेनां कानुनी राजया सम्मान यायेमाःगु खँ धाःगु दु। कानुनी प्रक्रियां विवाद ज्यंकेत इनाप यासें वय्कलं नं सेनां ज्वनातःपिं सकसितं तुरुन्त त्वःतेत माग यानादीगु दु ।

म्यानमारय् वंगु नोवेम्भरय् जूगु चुनावयात कयाः सत्तारुढ दल नेशनल लीग फर डेमोक्रेसी (एनएलडी) व सेना दथुइ विवाद ब्वलंगु खः । उगु चुनावय् एनएलडीं ८३ प्रतिशत मत कायेवं सेनां धाँधली जूगु द्वपं बिउगु खः ।

सम्बन्धित बुखँ

LEAVE YOUR COMMENTS