विवादास्पद पत्रकार गोस्वामीयात ज्वन

एजेन्सी – भारतया तसकं विवादास्पद टेलिभिजन प्रस्तोता व रिपब्लिक टिभीया सम्पादक अर्नव गोस्वामीयात म्हिगः प्रहरीं ज्वंगु दु । गोस्वामी सीमा विवादयात कयाः नेपाःया बारे नं गलत टिप्पणी याःगुलिं नेपालय् नं तसकं विरोध फयावयाच्वंम्ह पत्रकार खः ।

रिपब्लिक टिभीया कथं बुधवाः सुथय् हे गोस्वामीया छेँय् हे वयाः प्रहरीं वयात ज्वनायंकूगु खः, थ्व झ्वलय् गोस्वामी वनेत माने मजुइवं वयात प्रहरीं झातापात नं याःगु खः । भारतीय समाचार एजेन्सी पिटीआईया कथं निदँ न्ह्यव ५३ दँया छम्ह इन्टेरियर डिजाइनरं आत्महत्या याःगु मामिलाय् वयात गिरफ्तार याःगु खः । उबलय् आत्म्हत्या याःम्ह इन्टेरियर डिजाइनरं गोस्वामिं रिपब्लिक नेटवर्कया स्टुडियो दयेकाः ध्यबा मबिउ धकाः आत्महत्या न्ह्यः पौ च्वयाः त्वःताथकूगु खः । तर टेलिभिजनं थ्व मामिला न्हापा हे क्वचायेधुंकूगु व महाराष्ट्र सरकारं प्रतिशोधया भावनां गोस्वामीयात ज्वंगु खँ धाःगु दु ।

गोस्वामीयात ज्वनेवं भारतय् राजनीतिक वक्तव्यबाजी नं सुरु जूगु दु । केन्द्रीय सुचना तथा प्रशारण मन्त्री प्रकाश जावडेकरं गोस्वामीयात ज्वनाः महाराष्ट्र सरकारं इमर्जेन्सीया ईयात लुमंकाबिउगु खँ धाःगु दु ।