बेलायतय् लाःलाःथे कयेकूगु गोलीं लानाः खुम्ह सित

एजेन्सी- बेलायतया प्याइमाउथय् छम्हं मनुख लाःलाःथे गोली कयेकूबलय् उकी लानाः खुम्ह मनू सीगु दु । प्रहरीं बिउगु जानकारीकथं बिहिवाः स्थानीय ईकथं ६ बजेपाखे थ्व घटनां जूगु खः । प्रहरीं घटनाय् स्वम्ह मिजं व स्वम्ह मिसा सीगु धाःगु दु । उकी मध्ये झिदँ दुम्ह मिसामचा छम्ह नं लाःगु खः । प्रहरीं बिउगु जानकारीकथं जेक डेभिसन नांयाम्ह मनुखं लाःलाःथें गोली कयेकूगु खःसां वयां लिपा उम्ह मनुखं थःत थःम्हं गोली कयेकाः आत्महत्या याःगु खः ।

बेलायतय् ११ दँ लिपा थज्याःगु घटना जूगु खः । प्रहरीं थ्व घटनाय् आतंकवादया स्वापू मदु धाःगु दु । घटनायात कयाः अनुसन्धान जुयाच्वंगु दु । बेलायतया प्रधानमन्त्री बोरिस जोनसनं घटनाय् सीपिनिगु छेँजः व पासापिंतं समवेदना प्वंकूगु दु ।