ने. सं. ११४६ तछलाथ्व दशमी -

महाकवि सिद्धिदासया बुन्हिया लसताय् चिनाखँ व किपा च्वज्या कासा

येँ (नेपालभाषा टाइम्स) – सिद्धिदास स्मृति समाजया ग्वसालय् वंगु तछलाथ्व पंचमि (असार ५ गते) शुक्रवाः महाकवि सिद्धिदास महाजुया किपा च्वज्या व चिनाखँ ब्वने ज्याझ्वः जुल । महाकवि सिद्धिदास महाजुया १५८ क्वःगु बुन्हिया लसताय् उगु ज्याझ्वः जूगु खः ।

समाजया नायः मल्ल के. सुन्दर सभापतित्वय् जूगु ज्याझ्वः महाकवि सिद्धिदास महाजुया किपाय् खादा क्वाखाये काः न्ह्याःगु खः । ज्याझ्वलय् सभापति मल्ल के. सुन्दरं महाकवि सिद्धिदासया म्हसीकालिसें वय्कःया योगदान बारे बःचाहाकलं जानकारी बियादीगु खः ।

चिनाखँ कासाय् निजी व सामुदायिक ब्वने कुथिपाखें झिंस्वम्ह ब्वँमिपिंसं ब्वति काःगु खःसा किपा च्वज्या कासाय् झिंच्याम्ह ब्वँमिपिंसं ब्वति काःगु खः । चिनाखँ कासाय् हाइल्याण्ड इंग्लिश स्कुलया ७ गू तगिंया अंशिका पुतुवार न्हाप, महांकाल माध्यमिक विद्यालयया ७ गू तगिंया रमिशा शिवाकोटी लिउ, काठमाडौं मोडेल स्कुलया ७ गू तगिंया श्रेया श्रेष्ठ लियांलिउ व जगतसुन्दर ब्वने कुथिया ७ गू तगिंया सुबिता महर्जनं हःपाः सिरपाः त्याकादीगु खः ।

अथे हे किपा च्वज्या कासापाखे काठमाडौं मोडेल स्कुलया आज्ञा महर्जन (९) न्हाप, हाइल्याण्ड इंग्लिश स्कुलया आयुशा लामा (८) लिउ, अन्नपूर्ण माध्यमिक विद्यालयया न्हूजला मानन्धर (९) लियांलिउ, काठमाडौं मोडेल स्कुलया खुस्बु ठाकुर (८) व कन्या मन्दिर उच्च माध्यमिक विद्यालयया रेश्मा तामाङ (८) हःपाः सिरपाः त्याके त ताःलाःगु खः ।

निगुलिं कासाय् न्हापयात न्याद्वः, लिउयात स्वद्वः, लियांलिउयात निद्वःव हःपाःयात द्वःछि तकादां लिसें दसिपौ , गिफ्ट ह्याम्पर लःल्हाःगु खः ।कासाय् उत्कृष्ट जुयादीपिंत नेवाः जागरण मञ्चया संयोजक सुजीव वज्राचार्यंं खादा क्वखाये कादीगु खःसा नेपालभाषा एकेदे मिया भाइस चान्सलर डा. पुष्पराज राजकर्णिकारं दसिपौ व समाजया नायःलिसें ज्याझ्वःया सभापति मल्ल के. सुन्दरं दां सिरपाः लःल्हानादीगु खः ।

चिनाखँ कासाय् लोककवि राजभाई जकःमि व किपा च्वज्या कासाय् प्रदीप वज्राचार्य निर्णायकय् च्वनादीगु खः । ज्याझ्वलय् निगुलिं कासाय् ब्वति कयादीपिंत दसिपौ व गिफ्ट ह्याम्पर लःल्हाःगु खः । ज्याझ्वः येँ महानगर पालिकाया सहकार्यय् जूगु खः ।