नेवाः हाइकु ख्यः न्हय्क्वःगु बुसादँ हना
यल (नेपालभाषा टाइम्स) – नेवाः हाइकु ख्यः न्हय्दँ क्यंगु लसताय् वंगु आइतवाः छगू ज्याझ्वः जुल । क्वपुंद्वँय् च्वंगु सातोआकी भवनय् जूगु ज्याझ्वलय् हाइकु ख्यःया बुसादँया ज्याझ्वलय् सफू पितब्वज्या, हना व हाइकु वाचन याःगु खः ।
हाइकु ख्यःया नायः सुरेश प्रधानया सभापतित्वय् जूगु ज्याझ्वलय् प्रतिनिधिसभा सदस्य कुलभक्त शाक्य मूपाहांकथं झायादीगु खः । ज्याझ्वलय्न वासें मूपाहां सांसद शाक्यं नेवाः हाइकु च्वन्ह्याकेगु व हाइकु ख्यःया पलाःयात न्ह्यःने न्ह्याकेया निंतिं आर्थिक रुपं समस्या जुयाच्वंगु खःसा थम्हं फक्व ग्वाहालि यायेगु प्रतिवद्धता प्वंकादिल ।
नेपालभाषा एकेदेमिया भाइस चान्सलर लिसें समालोचक डा. पुष्पराज राजकर्णिकारं राष्ट्रिय व अन्तर्राष्ट्रिय हाइकु ख्यः व नेपालभाषा हाइकुया थीथी पक्षया बारे कुलादीगु खः ।
ज्याझ्वःया विशेष पाहां प्रतिभा समाजया कजि डा. वज्रराज शाक्यं हाइकुया उद्गमस् थल नेपाः जूगु खँ कनादिसें थुकियात कयाः दुग्यंक अनुसन्धान याये माःगु आवश्यक दुगु विचाः तयादिल ।
ज्याझ्वलय् हाइकु ख्यःया संरक्षण व विकासया निंतिं प्रकाशनपाखें योगदान बिया वयाच्वंगु धासें ईलोहं प्रकाशनया प्रबन्ध निर्देशक नरेशवीर शाक्ययात ‘नेवाः हाइकु हना’ पाखें हनेज्या याःगु खः ।
उगु ज्याझ्वलय् हाइकुया विषययात कयाः राधेश्याम प्रधान व अञ्जना ताम्राकार लगायतं नुगःखँ तयादीगु खःसा पीम्हं मल्याक साहित्यकार पिंसं हाइकु ब्वनाः न्यंकादीगु खः ।
LEAVE YOUR COMMENTS