दक्षिण एसियाया ६० लाख मनूत अझं खुसिबाः खतराय्

दक्षिण एसियाया थ्यंमथ्यं ६०लाख मनूत खुसिबाःया खतराय् लानाच्वंगु दु । मनसुनी वा व उकिया कारणं वःगु खुसिबालं लखौं मनूत प्रभावित जुयाच्वंगु व मेपिं ६० लाख मनूत नं मदिक्क वयाच्वंगु वां यानाः खतराय् लानाच्वंगु खँ धाःगु दु ।छुं न्हि न्ह्यवनिसें दक्षिण एसियाया फुक्क धयाथें देशय् तःधंगु खुसिबाः वयाच्वंगु दु ।

छगू समाचार कथं भारतया छगू राज्यय् जक झिगू लाख नागरिक विस्थापित जूगु दु । अनया सरकारं रेडक्रेसया अन्तर्राष्ट्रिय महासंघयात ग्वाहालिया निंतिं इनाप नं याःगु दु । अथेहे भारतया मेमेगु राज्यय् नं खुसिबाःया प्रकोप जुयाच्वंगु दु । बंगलादेश व नेपालय् नं खुसिबालं यक्वसिया ज्यान वंगु दुसा लखौं मनूत प्रभावित जूगु दु ।

थन नं रेडक्रसया अन्तर्राष्ट्रिय महासंघं उद्धार ज्या यानाच्वंगु दु । आपतकालीन व्यवस्थापनया निंतिं खाद्यान्न लिसें थीथी ग्वाहालि रेडक्रसं बियाच्वंगु दु । रेडक्रसया कथं खुसिबाः वइगु अप्वया वनाच्वंगु दुसा थुकिं अझं गुलिखे नागरिक विस्थापित जुइगु व क्षति जुइगु अवस्था दनि ।

रेडक्रसया अन्तर्राष्ट्रिय महासंघया दक्षिणएसिया क्षेत्रीय निर्देशक जेभियर क्यासलेनोसं धयादीगु दु, ‘खुसिबाःया प्रकोप न्हियान्हिथं अप्वया वनाच्वंगु दु । विस्थापित जूपिनि ल्याः न्हियानिहथं अप्वया वनाच्वंगु दु । अथेहे खुसिबाःया कारणं सीपिनि ल्याः नं अप्वया वनाच्वंगु दु । थ्व हे ल्याखं छुं न्हि तक प्रकोप अप्वया वन धाःसा दक्षिण एसियाली देशय् जक म्होतिं नं ६० लाख मनूत प्रभावित जुइगु खनेदु ।

थःपिं आपतकालीन व्यवस्थापनया निंतिं ज्या यानाच्वनागु खँ धयादिसें वय्कलं धयादीगु दु– खुसिबालं हःगु संकट समाधानया निंतिं ज्या यानाच्वनागु दु, तर मनसुन नकतिनि हे जक सुरु जूगुलिं थुकिं अझ तःधंगु क्षति याइगु खतरा दु । भारतीय राज्य आसामय् जक झिगू लाख नागरिक विस्थापित जूगु दु ।

थन ब्रम्हपूत्र खुसि बस्तिइ दुहां वयेवं म्होतिं नं ७५० गू गां चुइकायंकूगुदु । अथेहे नेपाःया दक्षिणपूर्वी भूभाग खुसिबालं यक्व क्षति जूगु दु । थन नं खुसिबालं यक्वसिया ज्यान वंगुदु । बंगलादेशय् नं खुसिबालं तःधंगुलिच्वः लाकूगु दुसा थन थ्यंमथ्यं १४ हजार नागरिक विस्थापित जूगु दु ।

सम्बन्धित बुखँ

LEAVE YOUR COMMENTS