ने. सं. ११४६ तछलाथ्व नवमी -

सामाजिक संजालं लुइकल स्वंगू दशक न्ह्यः तंगु मूर्ति

येँ (नेपालभाषा टाइम्स) – स्वंगू दशक न्ह्यः खुया यंकूगु द्वाल्खाया भैलः द्यःया मूर्ति नेपाः लित हयेत ताःलाःगु दु । थौं स्वयां स्वीस्वदँ न्ह्यः खुया यंकूगु आकाश भैरव (हाथ्वँ द्यः)या निगू मूर्ति वंगु असार ४ गते साविक थासय् प्रतिस्थापन याःगु खः ।

द्वाल्खां खुया यंकाः अमेरिका थ्यंगु भैरवया निगुलिं मूर्ति नेपाः लित हयेधुंकाः असार ४ गते सदरमुकाम चरिकोटनिसें सांस्कृतिक बाजंसहित बजाः चाःहिकाः साविकाया नक्छेँ त्वालय् च्वंगु प्रधानतय् कुलछेँय् प्रतिस्थापन याःगु खः । २०५० फागुन २२ व वयां दछि लिपा ०५१ फागुन २४ गते नक्छेँ त्वाःया प्रधानतय् कुलछेँपाखें भैरवया निगू मूर्ति खुया यंकूगु खः । मल्लकालीन ईया धयातःगु भैरवया उगु मूर्ति खुया यंकेधुंकाः छुं अत्तापत्ता मदयाच्वंगु खः ।

सामाजिक संजालय् सार्वजनिक जूगु छपाः पुलांगु किपाया ग्वाहालिं स्वीदँ न्ह्यः द्वाल्खां खुयायंकाः अमेरिका थ्यंगु मूर्ति लित हयेगु अभियान ताःलाःगु खः । प्यदँ तक मदिक्क कानुनी, कूटनीतिक व प्राविधिक कुतः लिपा वंगु असार ४ गते द्वाल्खाया बहुमूल्य सम्पदाया रुपय् दुगु आकाश भैरव (हाथ्वँ द्यः) थःगु हे थासय् लित हयेत सफल जूगु खः ।

मूर्ति खुया यंकूगु नीप्यदँ लिपा २०७४ सालया यँयाःया इलय् द्वाल्खाया अनिलचन्द्र श्रेष्ठं सामाजिक संजालय् भैलःद्यःया किपा सार्वजनिक यानादीगु खः । उगु इलय् वय्कलं थःगु फेसबुक पेजय् ‘किपाय् जक स्वये फइ झीगु हाथ्वँ द्यः’ शीर्षक तयाः भैरवया पुलांगु किपा सार्वजनिक यानादीगु खः । श्रेष्ठं तयादीगु उगु हे किपाया ग्वाहालिं तनाच्वंगु सम्पदा भैरवया मूर्ति मालेगु निंतिं छगू महत्वपूर्ण आधार जुया बिउगु खः । श्रेष्ठया उगु हे पोष्टया लिधंसाय् बालकृष्ण पासां छपु च्वसुतकं च्वयादीगु खः ।

वयां लिपा ‘लस्ट आर्टस् अफ नेपालं’ मूर्ति मालेगु निंतिं न्ह्याकूगु अभियानया झ्वलय् थःपिनिगु फेसबुक पेजपाखें अमेरिकाया रुविन व डलास म्युजियमय् हाथ्वँ द्यःया मूर्ति दुगु विवरण सार्वजनिक यायेवं नेपाः लित हयेगु प्रक्रिया न्ह्याकूगु खः । न्यादँ न्ह्यः ०७९ सालनिसें अनिलचन्द्र श्रेष्ठ, यज्ञकुमार प्रधान, अभियन्ता संजय अधिकारी, नेपाल हेरिटेज रिकभरी क्याम्पेन, लस्ट आर्टस् अफ नेपाल लगायतया समन्वयय् दसि प्रमाण संकलन, प्रहरी दर्ता यानातःगु पुलांगु जाहेरी, पुरातत्व विभागय् बियातःगु निवेदनलिसें अमेरिकी निकायलिसे कानुनी प्रक्रिया न्ह्याकेगु ज्या शुरु याःगु खः ।

थ्व झ्वलय् अमेरिकाया न्यूयोर्कस्थित महान्यायाधिवक्ताया ज्याकूलिसे नं तःक्वः तःक्वः भर्चुअल मुँज्या च्वंगु खः । ताःहाकःगु अनुसन्धान, मुँज्या, आवश्यक दक्वं प्रमाण मुंके धुंकाः अमेरिकाया निगू संग्रहालयय् तयातःगु भै लः द्यःया उगु ऐतिहासिक मूर्ति न्यूयोर्कय् च्वंगु नेपाली दूतावासयात लःल्हाःगु खः ।

मूर्ति नेपाः लितहयेगु निंतिं नेवाः गुथि न्यूयोर्कया नायः विजयमान सिंह व छ्याञ्जे प्रेमगोपाल महर्जनं आवश्यक समन्वय व माःगु ग्वाहालि यानादीगु खः । वय्कःपिं निम्हे सिनं मूर्ति नेपाः लित हयेगु निंतिं ढुवानी खर्चनिसें माःगु सकतां समन्वयय् महत्वपूर्ण ग्वाहालि यानादीगु खः । वय्कःपिनिगु हे ग्वाहालि व कुतलं द्वाल्खाया भैरवया निगू मूर्तिलिसें प्यंगू ऐतिहासिक मूर्ति नेपाः लित हयेत ताःलाःगु थुगु अभियानय् संलग्न जुयादीपिंसं धाःगु दु ।

पुरातत्व विभागं ०८० माघ १७ गते छगू पत्रकार सम्मेलन यानाः मूर्ति नेपाः थ्यंगु जानकारी बिउगु खः । वयां लिपा मूर्ति नेपाल राष्ट्रिय सङ्ग्रहालयय् सुरक्षित तयातःगु खःसा आवश्यक सकतां प्रक्रिया पूवंके धुंकाः स्वीदँ लिपा वंगु असार ४ गते आकाश भैरव (हाथ्वँ द्यः)या निगुलिं मूर्ति द्वाल्खाय् प्रतिस्थापन यायेत यंकूगु खः ।