एनओएया रजत जयन्ती व न्हूधाः

येँ (नेपालभाषा टाइम्स) – नेवाः अर्गनाइजेसन अफ अमेरिका (एनओएं) थःगु वार्षिक साधारणसभा व रजत जयन्ती ज्याझ्वः हंगु दु । अमेरिकाया वाशिंगटन डीसी महानगर क्षेत्रलिसें अमेरिकान्यंकं च्वंपिं नेवाःतय् छगू प्रतिष्ठित संस्था एनओएं थःगु रजत जयन्तीया लसताय् न्हूगु ज्यासना पुचःया नं ल्यज्या याःगु खः ।

एनओएं थःगु स्थापनाकालनिसें अमेरिकाय् च्वंपिं नेवाःतय्त छप्पँ याना तयेगु नापं भाषा, कला, संस्कृति, नेवाः म्हसीका ल्यंका तयेगु निंतिं थीथी ज्याझ्वः यायेगु नापं न्हू पुस्तायात नं स्यने कने यायेगु व थुकियात पुस्तान्तरण याये कथं थीथी ज्याझ्वः याना वयाच्वंगु दु । अथे हे संस्थां ने वाः समुदायया निंतिं माःगु ग्वाहालि यायेगु नं याना वयाच्वंगु दु ।

एनओए २५ दँ क्यंगु लसताय् छगू विशेष ज्याझ्वः नं याःगु खः। रजत जयन्ती ज्याझ्वलय् अमेरिकाया निंतिं नेपाली दूतावासया सल्लाहकार अरुणा घिसिङ मूपाहांकथं झायादीगु खः । ज्याझ्वलय् एनओएया नायः महिन्द्र प्रधान, डब्लुएनओ या नायः मनोहरलाल श्रेष्ठ लगायतं नुगःखँ तयादीगु खः ।

उगु हे ज्याझ्वलय् न्हूगु ज्यासना पुचःया नं ल्यज्या याःगु खः । सन् २०२६-२०२८ दँया निंतिं राजेशलाल श्रेष्ठया अध्यक्षताय् न्हूगु ज्यासना पुचः ल्यःगु खः । न्हूगु ज्यासना पुचलय् दिवाकर धौभडेल न्हापांम्ह न्वकु, बबिता श्रेष्ठ निम्हम्ह न्वकु, प्रतीक श्रेष्ठ मूछ्याञ्जे, नविनमोहन रंजित दांभरिं व सचिन वैद्ययात छ्याञ्जे ल्यःगु दु । अथेहे दुजलय् ज्योत्सना श्रेष्ठ, अमित खड्गी व शर्मिला श्रेष्ठ म्याक्विलियम्सयात ल्यःगु दु ।

दक्वं पदय् छम्ह छम्हेसिया जक उम्मेदवारी लाःगुलिं सकलें निर्विरोध निर्वाचित जूगु निर्वाचन समितिं जानकारी बिउगु दु । न्हूगु ज्यासना पुचः ल्ययेगु निंतिं श्यामलाल श्रेष्ठया संयोजकत्वय् उदय श्रेष्ठ व राजेश श्रेष्ठ दुजः जुयादीगु निर्वाचिन समिति नीस्वंगु खः ।