छन्हुं हे थप २२६म्हेसित कोरोना, संक्रमितत १७९८म्ह थ्यन

येँ – नेपालय् छन्हुया दुने हे २ सय स्वयां अप्व मनूतय्त कोरोना भाइरसया संक्रमण जूगु दु । वंगु नीप्यघौया दुने २ सय २६म्ह मनूतय्त संक्रमण जूगु दु । न्हूपिं संक्रमितत मध्ये २ सय १३म्ह मिजंत खःसा १३म्ह मिसात खः । थ्व नापं नेपालय् संक्रमित जूपिं १ हजार ७ सय ९८म्ह थ्यंगु दु ।

स्वास्थ्य तथा जनसंख्या मन्त्रालयया प्रवक्ता डा. विकास देवकोटाया कथं येँया राष्ट्रिय जनस्वास्थ्य प्रयोगशालाय् जूगु परीक्षणय् धनुषा, कपिलवस्तु, महोत्तरी, मकवानपुर, सर्लाही, सिरहा व उदयपुरया ९२म्ह मनूत संक्रमित जूगु दु । अथेहे विराटनगर, पोखरा, कर्णाली, सुर्खेत, धुलिखेल, भेरी, राप्ती व सेतीया प्रयोगशालाय् याःगु परीक्षणय् १ सय ३४म्ह मनूत संक्रमित जूगु खः ।

थौं हानं थप छगू जिल्लाय् संक्रमण खनेदुगु दु । सूदुरपश्चिम प्रदेशया डोटी १म्ह मनूयात संक्रमण जूगु दु । थ्व नापं नेपालय् संक्रमण ५९गू जिल्लाय् थ्यंगु दु ।