जसपाया ठाकुर पुचःयात सर्वोच्चया निगूगु मार

येँ -सर्वोच्च अदालतं याःगु थीथी फैसलां यानाः धमाधम मारय् लाना वनाच्वंगु जसपां सर्वोच्चया लिपांगु फैसलायात पालना यायेगु बाहेक मेगु विकल्प मदुगु खँ धाःगु दु । जसपाया नेता लिसें भूमिसुधार मन्त्रीपाखें पदमुक्त जुयादीम्ह लक्ष्मणलाल कर्णं सर्वोच्च अदालतं म्हिगः याःगु फैसलायात थःपिंसं स्वीकार यायेगु खँ कनादीगु दु ।

थ्व स्वयां न्ह्यः जसपाया हे इनाप कथं प्रधानमन्त्री ओलीं जारी यानादीगु नागरिकता सम्बन्धी अध्यादेश नं सर्वोच्च अदालतं बदर याना बिउगु खः । सरकारं नागरिकता सम्बन्धी अध्यादेश हये धाःगु हे कारणं जसपाया महन्थ ठाकुर पुचः थःगु पार्टी तछ्यानाः जूसां ओलीया समर्थनय् कुहां वःगु खः ।

अदालतं नागरिकता सम्बन्धी अध्यादेश बदर याना बीधुंकाः आः जसपाया नेतातय्त मन्त्री दयेकेगु ज्यायात समेत खारेज याना बिउगु दु । थुकिं यानाः थःगु हे पार्टीया मेपिं नेतातलिसे अडान कयाः पिहां वःपिं जसपाया ठाकुर पुचः मुद्दा व मन्त्री पद निगुलिं थासं विमुख जूगु दु ।

तर सर्वोच्च अदालतपाखें थज्याःगु फैसला याःसां नं प्रधानमन्त्री ओलीलिसेया थःपिनि सहकार्य धाःसा त्वाःमदलीगु खँ वय्कलं कनादीगु दु ।
सञ्चारकर्मीतलिसे खँ ल्हासें वय्कलं प्रम ओलीलिसे थःपिनि सहकार्य जारी हे जुयाच्वनीगु खँ कनादीगु दु । ओलीलिसेया थ्वहे सहकार्यं यानाः वय्कःया पार्टीइ कचवं पिहां वःगु खः ।

सम्बन्धित बुखँ

LEAVE YOUR COMMENTS