बञ्चरेडाँडाय् फोहोर वाके बिल, निलाया लागिं फोहोर वायेगु समस्या समाधान

येँ (नेपालभाषा टाइम्स)÷येँ महानगरपालिकाया फोहोर व्यवस्थापन यायेगु ज्या तत्कालया लागिं समाधान जूगु दु । साेमवाः बञ्चरेडाँडाय् फोहोर वाके बीगु धकाः सहमति जुइवं हे फोहोर वायेगु ज्या शुरु खँ येँ मनपाया प्रवक्ता नविन मानन्धरं कनादीगु दु ।

बञ्चरेडाँडाय् फोहोर वायेबलय् उकिं जःखः च्वंगु लागाय् छु गज्याःगु लिच्वः लाइ धकाः शहरी विकास मन्त्रालयं अध्ययन यायेगु व उकिं पिहां वइगु लिच्वःया आधारय् ज्या यायेगु धकाः सहमति यायेवं हे फोहोर वाके बिउगु खः ।

मखुसा स्थानीय मनूतय्सं भाद्र १ गतेनिसें फोहोर वाके बी मखु धकाः घोषणा यासें संघर्षया तयारी याःगु खःसा शहरी विकास मन्त्रालयं संघर्ष याःपिं स्थानीय जनतालिसे खँल्हाबल्हा यानाः तत्कालया लागिं समस्या ज्यंकेगु ज्या याःगु खँ धाःगु दु ।

शहरी विकास मन्त्रालयं निलाया दुने अध्ययन क्वचायेकेगु बचं बिउगु जुयाः स्थानीय मनूतय्सं आःया लागिं निला तक फोहोर वाके बीगु धकाः निर्णय याःगु खः । निला लिपा धाःसा सरकारं तयार याइगु रिपोर्टया आधारय् हानं मेगु पलाः ल्ह्वनेगु खँ स्थानीय संघर्ष समितिं धाःगु दु ।

फोहोर वाकेगु सहमति जुइवं सनिलंनिसें हे सलंसः गाडी सिसडोल वनाः फोहोर वाःगु खः । वंगु बुधवाःनिसें लँय् हे फोहोर वाना थकल धकाः स्थानीय मनूतय्सं फोहोरया गाडी पना बिउगु खः । वयां छवाः न्ह्यः सिसडोलय् दिकातःगु येँ महानगरपालिकाया डोजर व ट्रकय् अज्ञात मनूतय्सं अप्पां कयेकाः क्षति याना बिउगु खः । थुकिं यानाः येँया फोहोर सिसडोलय् वायेगु ज्या बन्द जुयाच्वंगु खः ।

थ्वहे झ्वलय् येँय् अस्तव्यस्त जुइक हे फोहोर मुनाच्वंगुलिं एमाले समर्थित युवा संघं साेमवाः वानेश्वर लागाय् फोहोर मुनाः यचुपिचु यायेगु ज्या याःगु खः । फोहोर द्वँचिनाः मनू हे जुइ मछिनाच्वंगु थासय् म्हिगः युवा संघया कार्यकर्तातय्सं साबेलं फोहोर मुनेगु ज्या याःगु खः ।

सर्वदलीय बैठक सःतेत इनाप
येँया फोहोर व्यवस्थापनया दीर्घकालीन समाधान मालेगु लागिं सर्वदलीय वार्ता यायेमाःगु सः पिहां वःगु दु । बञ्चरेडाँडा लागा लानाच्वंगु धादिङया धुनिवेशी गाउँ पालिकाया नेपाली कांग्रेस, माओवादी व नेकपा (एस) या नेतातय्सं साेमवाः छगू मंकाः वक्तव्य जारी यासें फोहोरया समस्या समाधान यायेगु लागिं थःपिं सहित सर्वदलीय बैठक यायेत इनाप याःगु खः । अथे हे प्रतिनिधिसभाय् नं एमालेया सांसद योगेश भट्टराईं थ्व समस्या समाधान यायेगु लागिं एमालेलिसे सहकार्य यायेत येँ मनपाया मेयर बालेन्द्र साहयात इनाप यानादीगु खः ।

मेयर साहं धाःसा सर्वदलीय बैठक सःतेत रुचि क्यनामदीगु खँ धाःगु दु । वय्कलं बरु राजनीतिक पार्टीतय्सं थःत असफल यायेगु लागिं फोहोरया राजनीति यानाच्वन धकाः आलोचना यानादीगु दु ।