ने. सं. ११४४ कौलाथ्व तृतीया -

युक्रेनया बुचाय् ‘नरसंहार’

एजेन्सी- रुसी सेनां युक्रेनया चिधंगु नगर बुचाय् आमहत्या याःगु धासें अन्तर्राष्ट्रिय समुदायं थुकिया भत्सर्ना याःगु दु । अमेरिकी विदेशमन्त्री एन्टोनी ब्लिन्कनं बुचाय् उखेथुखे मनूतय् सीम्ह हे सीम्ह जक खनेदुगु दृश्य तसकं निराशजनक धाःगु दु । अथेहे जर्मनी, फ्रान्स, ब्रिटेन व नेटोया नेतात स्तब्ध जूगु प्रतिक्रिया बिउगु दुसा युरापेली आयोगया प्रमुखं रुसविरुद्ध थप प्रतिबन्ध तयेगु प्रतिबद्धता प्वंकूगु दु ।

नरसंहार जूगु थाय्या दृश्य धकाः सार्वजनिक जूगु भिडियो क्लिपय् बुचा शहरया गल्लीइ अथें वांछ्वातःगु सीम्ह खनेदुगु खःसा सीपिं मनूतय् ल्हातय् खिपतं चिनातःगु खनेदुगु खः ।

रुसं धाःसा थ्व तस्बिरया सत्यतायात कयाः न्ह्यसः थंगु दु । रुसं बुचाय् युक्रेनी कट्टरपन्थीया उत्तेजनात्मक ज्यायात कयाः छलफल यायेत सुरक्षा परिषद्या आपतकालीन बैठक सःतेमाःगु माग याःगु दु ।

रुसी राष्ट्रपति भ्लोदिमिर जेलेन्स्कीं रुसं युक्रेनया सर्वसाधारणयात निशाना दयेकूगु खँ न्ह्यथँसें जेलेन्स्कीं रुसं थःगु क्षेत्रं लिहां वनेगु झ्वलय् नरसंहार यानावंगु व रुसी अपराधयात दण्डित यायेत प्रतिबन्ध जक तयां मगाः धाःगु खः । युक्रेनी विदेशमन्त्रीं रुसीं फौजं योजनाबद्ध ढंगं नरसंहार यानावंगु दाबी याःगु दु । बिबिसीया कथं युक्रेन फौजं बुचा शहरय् म्होतिं नं नीम्ह मिजंतय् सीम्ह लुइकेधुंकूगु दुसा उपिं मध्ये तःम्हेसिया ल्हाः लिउने यंकाः चिनातःगु अवस्थाय् दुगु खः । थ्वहे दथुइ छगू अमेरिकी प्रविधि कम्पनीं बुचाय् छगू सामूहिक चिहान लुइकागु व अन ४५ फुट तजाःगु गाः दुगु भूउपग्रह तस्बिरय् खनेदुगु धाःगु दु ।